Azərbaycan, Bakı, 19 mart/ Trend , müxbir S.Babayeva/ Microsoft Korporasiyası və Azərbaycan hökuməti arasında əməkdaşlıq haqqında strateji saziş yaxın üç ay ərzində imzalanacaq. Bu barədə çərşənbə günü Microsoft Azerbaijan-ın Baş direktoru Teymur Axundov məlumat verib.
"Hazırda biz bu işdə Azərbaycan hökumətini təmsil edən Rabitə və İnformasiya Texnologiyaları Nazirliyi ilə intensiv danışıqlar aparırıq", - o qeyd edib.
Sazişdə Azərbaycanda intellektual mülkiyyətin müdafiəsi, proqram təminatının leqallaşdırılması və Microsoft-un Azərbaycanda investisiya layihələrinin reallaşdırılması öz əksini tapacaq.
Azərbaycan hökuməti və Microsoft arasında strateji əməkdaşlıq haqqında sazişin imzalanması məsələsi, Davosda keçirilən Dünya İqtisadi Forumu çərçivəsində Azərbaycan prezidenti İlham Əliyev və Microsoft-un araşdırmalar və strategiyalar üzrə direktoru Kreyq Mandi tərəfindən müzakirə edilib.
Microsoft Azerbaijan 2005-ci ildən fəaliyyət göstərir. Onun vəzifələrinə PT bazarının inkişafı və Korporasiyanın məhsullarının yayılması, tərəfdaş və sifarişçilərin dəstəklənməsi, həmçinin, Korporasiyanın ən yeni texnologiyalarının lokallaşdırılması və Azərbaycan ərazisində sosial layihələrin həyata keçirilməsi daxildir.