Azərbaycan, Bakı, 22 iyul/ Trend , müxbir S.Babayeva/ Roterdam məhkəməsi Maltanın FIMbank və maraqlarının müdafiəsi Rabitə Nazirliyinə həvalə edilən Azərbaycan hökuməti arasında maliyyə məhkəməsi iddiası üzrə qərarını dekabrın 24-də elan edəcək, - nazirlikdən bildiriblər.
Məhkəmə əvvəlcə qərarını iyunda elan etmək niyyətində idi, lakin məsələnin mürəkkəbliyini nəzərə alaraq, onun bir qədər sonraya keçirilməsi qərara alınıb.
Nazirlik məhkəməyə bütün lazımi sənədləri, o cümlədən ən başlıcası - Fransa məhkəməsinin Azərbaycanın xeyrinə qəbul etdiyi qərarı təqdim edib.
Malta FIMbankı (First International Merchant Bank Ltd.) Azərbaycan hökumətinə qarşı, bankın dediyiə görə, dövlət zəmanəti ilə Azərbaycanın iki telekommunikasiya şirkətinə verdiyi $4,5 milyondan çox kredit məbləğinin ödənilməsi iddiası ilə çıxış edib. FIMbank ilk iddiasını 2004-cü ildə Roterdram və Paris məhkəmələrinə təqdim edib.
