Azərbaycan, Bakı, 6 yanvar /Trend, müxbir H.Vəliyev/
Yanvarın ikinci yarısından etibarən Azərbaycanın poçt rabitəsi operatoru "Azərpoçt" MMC-nin filial və şöbələrinin avtomatlaşdırılmış korporativ-informasiya sisteminə kütləvi surətdə qoşulmasına başlanılacaq. Bu barədə Azərbaycan Rabitə və İnformasiya Texnologiyaları Nazirliyinin poçt rabitəsi şöbəsinin müdiri Novruz Məmmədov deyib.
Məmmədovun sözlərinə görə, bu günə sistemə "Azərpoçt"un 700 filial və şöbəsi qoşulub. Onların 124-ü Bakıda yerləşir.
"Birinci rübün sonuna operatorun filial şəbəkəsinin texniki hazırlığından asılı olaraq, sistemdən poçt rabitəsinin 1200 şöbə və filialı istifadə edə biləcək. Ümumilikdə bu il poçt operatorunun şəbəkəsinin avtomatlaşdırılmış korporativ-informasiya sistemi ilə tam əhatə olunacağı gözlənilir", - Məmmədov qeyd edib.
Bu gün sistemə qoşulan 400-dən çox filial və şəbəkələr artıq Azərbaycan Mərkəzi Bankından əhaliyə maliyyə xidmətlərinin göstərilməsinə icazə alıblar. "Azərpoçt"un 37 poçt filialı avtomatlaşdırılmış korporativ-informasiya sisteminin baş moduluna qoşulub. Onların 30-da artıq əhaliyə maliyyə xidmətləri göstərilir.
Operatora yeddi maliyyə xidmətindən beşi üzrə xidmətin göstərilməsi icazəsi verilib. Onlara poçt hesablarının açılması və idarə edilməsi, pulköçürmə, debit kartların emissiyası, müştərinin sifarişi üzrə valyutanın alış-satışı ilə bağlı əməliyyatlar aiddir.
Bu il daha iki xidmətin - depozitlərin qəbulu və kredit kartlarının emissiyası məsələsinə baxılacaq.
Azərbaycanın bank sisteminə daxil olmaqla, "Azərpoçt" bank bazarının oyunçularına ciddi rəqabət təşkil edəcək. Bu gün Azərbaycanın bank bazarında 47 bank fəaliyyət göstərir. Filialların ümumi sayı 500-dən çoxdur, halbuki "Azərpoçt"un poçt şöbələrinin sayı 1600-ü ötür.
