Azərbaycan, Bakı, 3 fevral /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi zəlzələnin proqnozlaşdırılmasının monitorinq sistemi üçün məlumat mübadiləsi sistemi yaradıb. Bu barədə cümə günü Trend-ə Azərbaycan Milli Elmlər Akademiyasının Kibernetika İnstitutunun direktoru Telman Əliyev deyib.
Əliyevin sözlərinə görə, sistem seysmoakustik siqnalların birbaşa Kibernetika İnstitutunun serverinə ötürülməsini təmin edir.
Siqnalların ötürülməsi üçün yüksəkkeyfiyyətli peyk kanallarından istifadə ediləcək ki, bu da instituta daha yüksək və keyfiyyətli səviyyədə eksperimentlər aparmağa imkan yaradacaq.
Hazırda institut tərəfindən proqnozlaşdırmanın monitorinq sisteminin iki stansiyası işə salınıb. Bu stansiyalar "Qum adası" və Şirvan şəhərində yerləşib. Seysmik halların analizi üçün ARDNŞ-nin (Azərbaycan Respublikası Dövlət Neft Şirkəti) fəaliyyətsiz quyuları istifadə edilir.
"Martın sonunadək Siyəzən və Naftalan rayonlarında proqnozlaşdırmanın monitorinq sistemi üzrə stansiyaların tikintisi işləri başa çatacaq", - Əliyev qeyd edib.
Azərbaycan bu dörd stansiyanı istifadə etməklə, öz seysmik təhlükəsizliyini təmin edəcək. Belə ki, təkcə zəlzələnin vaxtını deyil, həmçinin koordinatlarını müəyyənləşdirmək imkanı yaranacaq.
Monitorinq sistemi küylərin təhlilinə əsaslanır ki, bu da 300-400 kilometr radiusda baş verən zəlzələlər barədə 5-20 saat əvvəlcədən xəbərdarlıq etməyə imkan verir.
Əliyevin əvvəl dediyinə görə, proqnozlaşdırmanın monitorinq sistemi Azərbaycanda ilin birinci yarısının sonunadək işə düşəcək.
"Bizim apardığımız eksperiment sentyabrda Bakıda keçiriləcək beynəlxalq simpozium çərçivəsində nümayiş etdiriləcək və dünya səviyyəli mütəxəssislərlə müzakirə ediləcək. Bu tədbir çərçivəsində "Seysmik cihazlar, sistemlər və texnologiyalar" mövzusunda seksiya təşkil ediləcək. Seksiyanın işində 14 mütəxəssisin iştirakı gözlənilir", - Əliyev vurğulayıb.