Azərbaycan, Bakı, 26 noyabr /Trend, müxbir H.Vəliyev/
Naxçıvan Muxtar Respublikasının (NMR) bütün dövlət qurumlarının birləşdirici xətləri optik-lif rabitə xətləri ilə əvəz edilib. bu barədə bazar ertəsi Trend-in NMR-in Rabitə və İnformasiya Texnologiyaları Nazirliyindən məlumat verilib.
Nazirliyin məlumatına görə, Gömrük Komitəsi, Baytarlıq Xidməti, Sanitar-Karantin Xidməti, Gigiyena və Epidemiologiya Mərkəzi və başqa qurumlar optik-lif rabitə ilə əhatə olunub.
NMR-in ərazisi üzrə çəkilən optik-lif magistralın ümumi uzunluğu 130 kilometri ötür. Optik xətt TAE (Trans-Asiya-Avropa) magistral xəttinə birbaşa qoşulub.
Nazirlik, həmçinin Ermənistanla təmas xətti istiqamətində 45 kilometr uzunluğunda optik magistralın çəkilməsi üzrə işləri başa çatdırıb ki, bu da NMR-in ucqar yaşayış məntəqələrini rabitə xidmətləri və genişzolaqlı internetə çıxış imkanları ilə əhatə etməyə imkan verəcək.
Hazırda NMR-in ümumi istifadədə olan telefon şəbəkəsinin şəbəkələrarası kabel infrastrukturu optik-lif rabitə xəttinə keçirilir.
ATS-in birləşdirici xətlərinin 80 faizindən çoxu optik xətlə əvəz edilib. NMR-də işə salınan ATS-lərin ümumi sayı 115 ədəddir.
Bu istiqamətdə işlər davam etdirilir və ilk növbədə, internet istifadəçilərinə göstərilən xidmətlərin keyfiyyətinin yaxşılaşdırılmasına yönəlib.