Azərbaycan, Bakı, 13 yanvar /Trend, müxbir H.Vəliyev/
2013-cü ildə Milli Sertifikat Xidmətləri Mərkəzi tərəfindən verilən elektron rəqəmsal imzaların ümumi sayı 7,6 dəfədən çox artaraq cari ilin yanvarın 1-nə olan vəziyyətə görə 17 834 ədəd təşkil edib. Bunu bazar ertəsi Trend-ə Rabitə və İnformasiya Texnologiyaları Nazirliyinin Məlumat Hesablama Mərkəzindən (MHM) deyiblər.
MHM-in məlumatına görə, verilən elektron rəqəmsal imzaların ümumi sayından dövlət strukturlarının payına 12 343 ədəd düşüb, 729 ədəd hüquqi şəxslərə və 4 762 ədəd isə vətəndaşlara verilib.
"Elektron hökumət" portalına müraciətlərin sayında xeyli artım qeydə alınıb. Ötən ilin əvvəlində müraciətlərin sayı 6600 olduğu halda, 2014-cü il yanvarın 1-nə olan vəziyyətə görə, bu göstərici 262 566-ya çatıb. 2013-cü il ərzində portala baş çəkənlərin sayı 8 928-dən 456 712-dək artıb. Ötən dövr ərzində portaldakı elektron xidmətlərdən 736 447 dəfə istifadə olunub.
"Elektron hökumət" portalında (e-gov.az) təsdiq edilmiş elektron xidmətlərin (4 285 ədəd) 217-dən istifadə etmək mümkündür. Dövlət strukturlarının saytlarında yerləşdirilən elektron xidmətlərin ümumi sayı isə 454 ədəd təşkil edir.