Azərbaycan, Bakı, 8 iyul /Trend, müxbir Hüseyn Vəliyev/
2014-cü ilin iyununda Milli Sertifikat Xidmətləri Mərkəzi tərəfindən verilən elektron rəqəmsal imzaların ümumi sayı 1,26 faiz artaraq iyunun 1-nə 19 239 ədəd təşkil edib. Bu barədə Trend-ə Rabitə və Yüksək Texnologiyalar Nazirliyinin Məlumat Hesablama Mərkəzindən (MHM) deyiblər.
MHM-in məlumatına görə, verilən elektron rəqəmsal imzaların ümumi sayından dövlət strukturlarının payına 13 034 ədəd düşüb, 1 004 ədəd hüquqi şəxslərə, 5 201 ədəd isə vətəndaşlara verilib.
"Elektron hökumət" portalına müraciətlərin sayında da əhəmiyyətli artım qeydə alınıb.
İyunda müraciətlərin sayı 129 805 ədəd olub. Portala müraciətlərin ümumi sayı 2012-ci ilin dekabrından 2014-cü il iyunun 30-dək 799 944 ədəd təşkil edib. 2013-cü ilin dekabrından 2014-cü il martın 1-dək portala müraciətlərin sayı 532 043 ədəd olub. Hesabat dövründə portaldakı elektron xidmətlərdən 1 385 054 dəfə istifadə olunub.
"Elektron hökumət" portalında (e-gov.az) təsdiq edilmiş elektron xidmətlərin sayı 439 ədəd təşkil edir və portalda 277 elektron xidmətdən istifadə etmək mümkündür. Dövlət strukturlarının saytlarında yerləşdirilən elektron xidmətlərin ümumi sayı isə 455 ədəd təşkil edir.
