Azərbaycan, Bakı, 29 avqust /Trend, müxbir Hüseyn Vəliyev/
"Azərpoçt" MMC-nin buraxdığı "MasterCard" ödəniş kartlarının sayı 22 min ədədə çatır. Bunu cümə günü Trend-ə MMC-dən deyiblər.
Kartlara "MilliKart" prosessinq mərkəzi tərəfindən xidmət göstərilir.
Poçt operatorunun buraxdığı kartların ümumi sayından 11 mini aktivdir.
Hazırda "Azərpoçt"un ödəniş kartları poçt operatorunun sistemində əməkhaqqıların verilməsi üçün istifadə olunur.
MMC-nin məlumatına görə, 2014-cü ilin yanvar-iyun aylarında poçt operatorunun kartları üzrə ümumi dövriyyə 13,3 milyon manatı ötüb.
Hazırda quraşdırılmış "Azərpoçt" bankomatları 15, POS-terminalların sayı isə 50-dən çoxdur. Poçt operatoru gələcəkdə POS-terminalların sayını xeyli artırmağı planlaşdırır.
"Azərpoçt"un filial və poçt şöbələrinin sayı 1600-ü ötür.
