Azərbaycan, Bakı, 8 sentyabr /Trend, müxbir Hüseyn Vəliyev/
Azərbaycan Milli Elmlər Akademiyasının (AMEA) İnformasiya Texnologiyaları İnstitutu "AzScienceNet" elmi kompüter şəbəkəsinin məlumatlarının ötürülməsi sürətini 250 meqabit/saniyəyədək artırıb. Bu barədə Trend-ə İnstitutundan bildiriblər.
İlin əvvəli ilə müqayisədə artım 19 faiz təşkil edib. İnstitut tərəfindən akademiyanın strukturları arasında qlobal internet şəbəkəsinə çıxışın sürətinin səmərəli bölüşdürülməsi üzrə işlər aparılır.
AMEA-nın institutlarının hər birinə orta hesabla 5-7 meqabit/saniyə düşür.
Hazırda "AzScienceNet" şəbəkəsinə AMEA-nın 35 institutundan 32-si qoşulub. İlin sonuna kimi digər təşkilatların (Aşqarlar Kimyası İnstitutu, Azərbaycan Milli Tarix Muzeyi və Dendrologiya İnstitutu) şəbəkəyə qoşulacağı gözlənilir.
İTİ AzScienceNet şəbəkəsi çərçivəsində reallaşdırılması planlaşdırılan əsas perspektivli istiqamətləri müəyyən edib. Onların arasında şəbəkənin infrastrukturunun ən yeni texnologiyalar bazasında genişləndirilməsi və təkmilləşdirilməsi, simsiz Wi-Fi nöqtələrinin açılması, AzSciencenet hostinq xidmətləriin göstərilməsi, "buludlu" hesablamalar, təhsil rouminqi (EduRoam) xidmətləri, institutun DATA mərkəzinin resurslarından istifadə imkanlarının genişləndirilməsi və beynəlxalq əməkdaşlıq məsələləri də var.