Azərbaycan, Bakı, 12 sentyabr /Trend, müxbir Hüseyn Vəliyev/
Azərbaycanın Rabitə və Yüksək Texnologiyalar Nazirliyinin Elektron Təhlükəsizlik Mərkəzi internet servis provayderlərinin şəbəkə infrastrukturunun auditini aparacaq. Bu barədə Trend-ə Mərkəzdən bildiriblər.
Hazırda Azərbaycanın ilkin provayderi "Delta Telecom" şirkətinin infrastrukturunun auditinin keçirilməsi üzrə müqavilənin imzalanması haqqında ilkin razılıq əldə olunub. Audit informasiya təhlükəsizliyi risklərinin hərtərəfli qiymətləndirilməsinə əsaslanacaq.
İnformasiya təhlükəsizliyi sistemlərinin yoxlamaları Bakı-2015 birinci Avropa Oyunlarına hazırlıq işləri çərçivəsində internet hücumlardan uyğun mühafizə səviyyəsinin təminatı və informasiya mühafizə sistemində çatışmazlıqların üzə çıxarılması üçün Elektron Təhlükəsizlik Mərkəzi qarşısında qoyulmuş məsələlərdən biridir.
Şirkətlərin internet şəbəkələrinin yoxlanılması internet vasitəsilə sistemə soxulmaların mümkün üsullarının aşkar edilməsinə kömək edəcək. Mərkəzin mütəxəssisləri tərəfindən istifadə olunan avadanlıqlarda cinayətkarların informasiya sistemlərinin məsafədən gizli idarə edilməsi üçün istifadə olunan "backdoor"ların olması ilə bağlı təhlil aparılacaq. İnternet xidmətləri tədarükçülərində olan yüksək texnologiyalı avadanlıqlar dəqiq yoxlanılacaq və test ediləcək.
Azərbaycanın Rabitə və Yüksək Texnologiyalar Nazirliyinin Elektron Təhlükəsizlik Mərkəzinin fəaliyyətinin təmin edilməsinə dair fərman Azərbaycan Prezidenti tərəfindən 2013-cü il martın 5-də imzalanıb. Bu Sərəncamla Mərkəzin Əsasnaməsi də təsdiqlənib. Mərkəz kibertəhlükəsizlik sahəsində informasiya infrastrukturu subyektlərinin fəaliyyətinin koordinasiyası, ölkə səviyyəsində, mövcud olan və mümkün elektron təhlükə haqqında məlumat vermək, kibertəhlükəsizlik sahəsində əhalinin, özəl və başqa strukturların (istifadəçilərin) maarifləndirilməsi və onlara metodik kömək göstərməklə məşğul olur.
