Azərbaycan, Bakı, 13 sentyabr /Trend, müxbir Hüseyn Vəliyev/
2014-cü ilin yanvar-avqust aylarının yekununa görə, Azərbaycanın mobil qurğular bazarında Finlandiyanın "Nokia" şirkətinin payı 61,72 faiz azalıb. Trend-in məlumatına görə, bu barədə "Global Stats" statistika mərkəzinin yaydığı hesabatda deyilir.
2014-cü il sentyabrın 1-nə olan vəziyyətə görə, bu şirkətin telefonlarının Azərbaycan bazarında payı 9,26 faiz təşkil edir. 2013-cü ilin analoji dövrü ilə müqayisədə "Nokia"nın payı 68,1 faiz azalıb. Şirkət Azərbaycanın mobil telefonlar bazarında üçüncü yeri tutur.
"Global Stats"ın məlumatına görə, 2014-cü ilin ilk 8 ayının nəticəsinə əsasən, Azərbaycanın mobil qurğular bazarında "Apple" şirkətinin payı 50,57 faiz artıb. "Apple" Azərbaycanda mobil qurğuların populyarlığına görə ikinci yeri tutur və onun ölkə bazarında payı 27,63 faizdir. 2013-cü ilin eyni dövrü ilə müqayisədə şirkətin payının artımı 31,63 faiz təşkil edib.
Hesabat dövründə Azərbaycan bazarında "Samsung" şirkətinin mobil qurğularının payı 17,82 faiz artıb. "Samsung" 43,5 faizlə Azərbaycanın mobil telefonlar bazarında birinci yeri tutur. Ötən ilin eyni dövrü ilə müqayisədə "Samsung" qurğularının payının artımı 39,11 faiz təşkil edib.
"Sony" mobil qurğuları 6,07 faiz payla dördüncü yerdə qərarlaşıb. Sonrakı yerləri naməlum istehsalçıların mobil qurğuları (əsasən Çin məhsulları) - 6,18 faiz, "Huawei" - 2,47 faiz, "Blackberry" - 1,08 faiz, LG - 1,02 faiz və "Google" 0,36 faiz payla tutur.