Azərbaycanın Rabitə və İnformasiya Texnologiyaları Nazirliyi bir sıra ölkələrlə rabitə sahəsində əməkdaşlıq haqqında sazişlərin hazırlanması istiqamətində iş aparır. Trend in nazirliyə istinadən xəbər verdiyi kimi, hazırda Rusiya Federasiyasının İnformasiya Texnologiyaları və Rabitə Nazirliyi ilə "İnformasiya texnologiyaları, poçt və telekommunikasiya sahəsində əməkdaşlıq haqqında" saziş üzərində iş həyata keçirilir. Bu sənədin oktyabrda informasiya texnologiyaları üzrə BakuTel 2006 12-ci beynəlxalq sərgisində imzalanması planlaşdırılır.
Digər sənəd Azərbaycan və Özbəkistan hökmətləri arasında informasiya və kommunikasiya texnologiyaları sahəsində əməkdaşlıq haqqında sazişdir.
Hazırda Bolqarıstan, Latviya, Macarıstan, Finlandiya, İsveç Krallığı, İspaniya, Ltiva, Sloveniya və Xorvatiya ilə rabitə və İT sahəsində əməkdaşlıq haqqında sazişlərin layihələri hazırlanıb və razılaşdırılmaq üçün müvafiq instansiyalara göndərilib.
Çin, Malayziya, İndoneziya, Hindistan, Yaponiya ilə imzalanmağa hazır olan əməkdaşlıq haqqında sazişlər, o cümlədən Koreyanın "KİPA" (Korean IT Industry Promotion Agency) agentliyi, ABŞ-ın Ticarət Departamenti, Kanada ilə elektron hökumət sahəsində "Qarşılıqlı anlaşma haqqında" memorandumlar var.
