Azərbaycan, Bakı, 19 fevral / Trend müxbir V.İmanov/
İtaliyanı Bakıda keçiriləcək "Eurovision 2012" müsabiqəsində Nina Zilli təmsil edəcək. Trend-in məlumatına görə, bu barədə yarışmanın rəsmi saytı bildirib.
Nina Zilli təxəllüsü ilə çıxış edən Mariya Çiara Fransketta (ital. Maria Chiara Fraschetta) 1980-ci ilin 2 fevral tarixində İtaliyanın Pyaçenca şəhərində anadan olub. O bütün uşaqlığını İrlandiyada keçirib və İtaliyaya qayıtdıqda konservatoriya qəbul olunub. Konservatoriyada təhsilini başa vurduqdan sonra ifaçı ABŞ-a köçüb və orada 2 il yaşayıb.
İtaliya Bakıda keçiriləcək "Eurovision 2012" müsabiqəsinin 26 mayda keçiriləcək final mərhələsində çıxış edəcək.
Xatırladaq ki, Eurovision 2012-nin birinci yarımfinalı mayın 22-də, ikinci yarımfinalı mayın 24-də, finalı isə mayın 26-da olacaq.
Şou "Bakı Kristal Zalı"nda keçiriləcək.