Bakı. Trend:
İngiltərənin şərqində yerləşən Tetford şəhərində sığınacaq axtaran şəxslərə qarşı yönəlmiş anti-immiqrasiya etirazları üçüncü gecə ardıcıl olaraq davam edib.
Bu barədə Norfolk Polis Departamentindən məlumat verilib.
Məlumata görə, onlarla etirazçı sığınacaq axtaranların yaşadığını düşündükləri evlərə hücum edib və hüquq-mühafizə orqanları ilə toqquşub.
Etirazlar Tetford yaxınlığında istifadədən çıxarılmış Kral Hərbi Hava Qüvvələrinə məxsus hərbi bazada sığınacaq axtaran şəxslərin yerləşdirilməsi planına qarşı təşkil olunub. Çərşənbə axşamından bəri keçirilən aksiyalar zamanı ümumilikdə beş nəfər saxlanılıb.
Norfolk polisinin rəisi Pol Senford BBC-yə bildirib ki, "üç gecə ardıcıl olaraq bir qrup insan qəbuledilən davranış sərhədlərini aşıb". O, hücuma məruz qalan evlərin bəzilərində həqiqətən də sığınacaq axtaran şəxslərin yaşadığını təsdiqləyib.
"Onların təhlükəsizliyini təmin etmək üçün iki və ya üç dəfə sakinləri polis müşayiəti ilə həmin evlərdən çıxarmağa məcbur olduq", – deyə Senford qeyd edib.
The Guardian qəzetinin məlumatına görə, hökumətlə sığınacaq axtaranların yerləşdirilməsi barədə müqavilə bağlamış ev sahiblərinin ünvanlarının siyahısı əvvəlcədən internetdə yayılmışdı.
Norfolk polisi bölgəyə əlavə qüvvələr göndərib. Qurumun açıqlamasında bildirilib ki, hüquq-mühafizə orqanları fiziki zorakılıq göstərən etirazçılarla qarşılaşıb. Hadisələr zamanı bir polis əməkdaşı daş zərbəsi alıb, bir qadın polis əməkdaşı isə ağır şəkildə dişlənib.
Böyük Britaniyanın Daxili İşlər Nazirliyi Tetfordda baş verən hadisələri, o cümlədən ön cəbhədə xidmət aparan polis əməkdaşlarına qarşı hücumları qəti şəkildə pisləyib.
