Bakı. Trend:
Baş nazir Peter Macyarın rəhbərlik etdiyi Macarıstanın yeni hökuməti hesab edir ki, əvvəlki hakimiyyətin dövlət vəsaitlərini ümumilikdə təxminən 6 milyard avro məbləğində qanunsuz xərcləməsi ilə bağlı çoxsaylı halları müəyyənləşdirə bilib. Nazirlər Kabinetinin məlumatına görə, bununla əlaqədar prokurorluğa, eləcə də digər hüquq-mühafizə orqanlarına 21 müraciət göndərilib və onların 11-i üzrə artıq araşdırmalara başlanılıb.
“Hökumət son iki onillik ərzində dövlət vəsaitlərindən qanunsuz, israfçı və səhlənkar istifadə hallarını qətiyyətlə müəyyənləşdirmək niyyətindədir. Vəzifələrinin icrasına başladıqdan sonra hökumət baş nazirin aparatının və müxtəlif nazirliklərin fəaliyyətinin yoxlanılmasına təşəbbüs göstərib, bundan sonra bu araşdırmalar zamanı aşkar edilmiş sui-istifadə halları ilə bağlı çoxsaylı şikayətlər təqdim edib. İndi bu şikayətlərə baxılmasının gedişini mütəmadi olaraq yenilənən internet saytında izləmək mümkündür”, - deyə Nazirlər Kabinetinin yaydığı məlumatda bildirilir.
Qeyd olunur ki, ilkin hesablamalara görə, söhbət ümumi dəyəri 2,1 trilyon forint (5,8 milyard avro) olan sövdələşmələrdən gedir. Onların böyük hissəsi Macarıstanın İxrac-İdxal Bankının iştirakı ilə həyata keçirilib, bəziləri isə xaricdəki layihələrə aid olub. Hökumət bu razılaşmaların bağlanması zamanı korrupsiya komponentinin olmasını istisna etmir.
Korrupsiyaya qarşı mübarizə aprelin 12-də keçirilən parlament seçkilərində qələbədən sonra Macarıstanda hakimiyyətə gələn “Tisa” partiyasının seçkiqabağı proqramının əsas bəndi olub. Macyarın formalaşdırdığı yeni hökumət əvvəlki Viktor Orban hökuməti tərəfindən bağlanmış beynəlxalq sazişlər də daxil olmaqla, bütün dövlət müqavilələrinə yenidən baxılması prosesini davam etdirir.
