Bakı.Trend:
Las-Veqas məhkəməsində andlı münsiflər heyəti 1996-cı ildə hip-hop ulduzu Tupak Şakurun (2Pac) qətlində 63 yaşlı Dueyn “Kiffi Di” Devisi təqsirli bilib.
Bu barədə BBC məlumat yayıb.
Daha əvvəl Devis reperin öldürülməsini təşkil etməkdə ittiham olunmuşdu. Silahdan istifadə etməklə törədilmiş birinci dərəcəli qətldə təqsirli bilinən Devisi şərti azadlığa buraxılma imkanı olmadan ömürlük həbs cəzası gözləyir. Hökm oktyabrın 13-də açıqlanacaq.
Məhkəmə prosesi zamanı günahsız olduğunu israrla bildirən Devis “bu qərardan apellyasiya şikayəti verməyi planlaşdırdığını” deyib.
İstintaq musiqiçinin öldürüldüyü tapançadan atəş açanın konkret olaraq kim olduğunu müəyyən edə bilməyib. Lakin Nevada ştatının qanunlarına əsasən, Devis özü tapançadan atəş açmasa belə, qətldə məhkum edilə bilər.
Andlılar heyəti hökmü çıxarmazdan əvvəl təxminən üç saat müşavirə keçirib. Hökm elan edildikdən sonra Şakurun bacısı Sekiva göz yaşlarına boğulub və prokurorları qucaqlayıb. Məhkəmə iclasında iştirak edən Devisin oğlu isə əli ilə üzünü örtüb.
Tupak Şakur 7 sentyabr 1996-cı ildə Las-Veqasda güllələnib. O, musiqi maqnatı Merion “Şuq” Naytla birlikdə çıxış etməli olduğu 662 klubuna gedirdi. Şakur və Naytın olduğu qara BMW svetoforda dayanarkən onların yanında ağ rəngli “Cadillac” dayanıb və avtomobildən dörd dəfə atəş açılıb. Reper aldığı yaralardan sentyabrın 13-də vəfat edib, Nayt isə sağ qalıb.
Devis 2023-cü ildə Tupakın qətlinin təşkilində ittiham olunub. Buna Devisin reperin öldürülməsinin bəzi təfərrüatlarından bəhs etdiyi memuarlarını dərc etməsindən sonra başlanılıb. Kitabda bildirilirdi ki, Devis reperə atəş açılan avtomobildə olub və məhz o, qətldə istifadə edilən tapançanı atəş açan şəxsə verib.
