Bakı. Trend:
ABŞ səhiyyə nazirinin müşaviri, hərbi həkim Tereza Lonq keçmiş Ağ Ev rəhbəri Co Baydenin prezidentliyi dövründə (2021–2025) amerikalı hərbçilərin COVID-19-a qarşı vaksinasiyanın fəsadları nəticəsində mümkün ölüm hallarını araşdırır.
Bu barədə Politico nəşri yazır.
Nəşrin məlumatına görə, Lonq Bayden administrasiyası dövründə hərbçilərin COVID-19-a qarşı vaksinasiyasına nəzarət edən yüksək vəzifəli CIA əməkdaşının işdən çıxarılması ilə bağlı məhkəmə prosesində bildirib ki, müdafiə naziri Pit Heqset və səhiyyə naziri Robert Kennedi ilə birlikdə 2021–2022-ci illərdə hərbçilər arasında vaksinasiya ilə ölüm halları arasındakı əlaqəni araşdırır. Həmin dövrdə Ağ Ev rəhbərinin hərbi qulluqçuların məcburi vaksinasiyası ilə bağlı sərəncamı qüvvədə olub. Lonq məhkəməyə bildirib ki, COVID-19-a qarşı vaksinasiya olunduqdan sonra baş verdiyi bildirilən 28 ölüm halından xəbərdardır.
Politico-nun istinad etdiyi 2024-cü il araşdırmasına əsasən, Pfizer və ya Moderna vaksinləri bir neçə yüz insanda ürək əzələsinin iltihabına səbəb olub. Pentaqonun bu il açıqladığı hesabatda da vaksinasiya sonrası hərbçilər arasında ürək xəstəliklərinin sayının artdığı qeyd olunur. Lakin araşdırmada ölüm halları barədə heç bir məlumat yer almayıb.
Politico yazır ki, Lonqun əməkdaşlıq etdiyi Robert Kennedi vaksinasiyanın əleyhdarı kimi tanınır. Onun göstərişi ilə onilliklər ərzində vaksinasiya ilə autizm arasında əlaqənin olub-olmadığını müəyyənləşdirmək məqsədilə nəticəsiz araşdırmalar aparılıb.
Lonq hazırkı elmi araşdırma çərçivəsində ABŞ Səhiyyə və Sosial Xidmətlər Nazirliyinin vaksinlərin yan təsirləri barədə hesabat sistemində qeydə alınmış, lakin təsdiqlənməmiş 2 544 hərbçi ölümünün COVID-19 vaksinləri ilə əlaqəli olub-olmadığını müəyyənləşdirmək istəyir.
Onun sözlərinə görə, araşdırmanın bir il ərzində başa çatdırılması mümkündür.
