Azərbaycan, Bakı, 10 sentyabr /Trend, müxbir Ş.Cavadsoy/
9 aylıq fasilədən sonra populyar teleaparıcı, bəstəkar, prodüser və ən nəyahət, şoumen Murad Arif yenidən Lider TV-də özünün yaratdığı "Solo" verilişində aparıcı kimi görünəcək. Bu xoş xəbəri ilk olaraq Trend oxucuları ilə bölüşən Murad qayıdışı barədə bunları dedi.
"Yaranmış fasilə zamanı bolluca istirahət etdim. Avropa ölkələrini gəzib-dolaşdım. Avropanın hansı ölkəsində oldumsa, həmyerlilərimiz mənə bir söz deyirdilər - "evimizdə yalnız Lider telekanalına baxmaq imkanımız var. Heyf ki, efirdə görünmürsən". Nəhayət ki, efirə çıxacağım günə sayılı saatlar qaldı. Məndən sonra "Solo"ya aparıcılıq etmiş dostlarıma çox təşəkkürümü bildirirəm. Onların səyi nəticəsində verilişə olan maraq azalmadı. 12 sentyabrdan etibarən həftəiçi hər gün saat 13:30-da bütün tamaşaçıları "Solo"nu izləməyə dəvət edirəm", - Murad Arif belə dedi.
Verilişinin canlı yayımla nümayiş olunacağını vurğulayan teleaparıcı edəcəyi yeniliklər barədə də danışdı. "Solo" mənim üçün sadəcə yaratdığım layihə deyil. "Solo" mənim üçün həyat tərzidir. Bilənlər bilir ki, musiqi dəlisiyəm... Hər günüm musiqi dinləyib, öyrənməklə keçir. Musiqinin bütün janrları ilə maraqlanır, peşəkar musiqiçilərlə tanış olub özüm də musiqilər yaradıram. Çalışacağam ki, yeni mövsümdə "Solo"da Azərbaycan musiqi incilərinə daha çox yer ayıraq. Ən böyük istəyim isə SSRİ-nin xalq artisti, böyük sənətkarımız Zeynəb xanım Xanlarovanı və Azərbaycanın milli sərvəti olan muğamlarımızı dünya ictimaiyyətinə sevdirən xalq artisti Alim Qasımovu, eləcə də caz kraliçası Əzizə Musatafazadəni qonaq çağırıb onlarla həmsöhbət olmaqdır. İnşallah, bütün bunları etməyə çalışacağam!" - Arif fikirlərini belə tamamladı.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
.jpg)
.jpg)
