Azərbaycan, Xaçmaz, 24 iyun / Trend , müxbir A.Qafarov/ Azərbaycanın şimal regionunda yerləşən Xudat şəhərinin sakinləri etiraz aksiyası keçiriblər.
Xudat şəhər sakinləri çərşənbə axşamı Xudat-Nabran yolundakı körpünün yaratdığı problemlə əlaqədar etiraz aksiyasına başlayıblar.
Trend -un bölgə müxbirinin məlumatına görə, ötən ilin noyabrından həmin yoldakı körpünün təmirə dayanması səbəbindən avtomobillər Xudat şəhərinin mərkəzi hissəsindən hərəkət edir.
Şəhər sakinləri iri yük maşınlarının həmin ərazidən hərəkətinə etiraz olaraq bu gün saat 12:00-13:00 radələrində yolu bağlayıblar.
Xudatdan Nabran istiqamətinə gedən yolda yerləşən körpü səkkiz aydır ki, təmirə dayanıb və bu səbəbdən həmin yolda avtomobillərin hərəkəti məhdudlaşdırılıb. Yerli icra strukturlarının müdaxiləsindən sonra etiraz aksiyası dağıdılıb.
Xudat şəhəri paytaxt Bakıdan 190 kilometr şimalda yerləşir.
Məqalə müəllifi ilə əlaqə ünvanı: [email protected]
