Nizami rayon prokurorluğunun məlumatı əlavə olunub (ilk xəbər saat 15:49-da yayılıb)
Azərbaycan, Bakı, 2 dekabr /Trend, müxbir K.Zərbalıyeva/
Bakıda oğlan sevdiyi qızı və özünü odlu silahla vurub.
Bakının Nizami rayon prokurorluğundan cümə günü Trend-ə verilən məlumata görə, saat 15:00 radələrində 238 saylı məktəbin arxasında Ramin Əsgərov odlu silahla əvvəlcə sevdiyi qızı - Aytən Şahbazovanı, sonra isə özünü vurub.
Məlumata görə, Şahbazova hadisə yerində keçinib, Əsgərov isə yaralı vəziyyətdə xəstəxanaya aparılıb.
İlkin məlumata görə, hadisə qısqanclıq zəminində baş verib.
Faktla bağlı araşdırmaya başlanılıb.
3 saylı şəhər Klinik Xəstəxanasından Trend-ə bildirilib ki, Əsgərov həmin xəstəxanaya yerləşdirilib, hazırda əməliyyatdadır.
Xəstəxanadan bildirilib ki, yaralının vəziyyəti ağırdır.
Nizami rayon prokurorluğundan Trend-ə bildirilib ki, faktla bağlı Cinayət Məcəlləsinin qəsdən adam öldürmə (120.1) və qanunsuz olaraq odlu silah saxlama, daşıma (228.1-ci) maddələri ilə cinayət işi başlanıb.
Məlumata görə, Əsgərov Şahbazovaya aşiq olsa da, qız onun sevgisini qəbul etməyib. Hadisə də bu səbəbdən baş verib.