Azərbaycan, Bakı, 25 fevral /Trend, müxbir İ.İzzət/
Paytaxtın Xətai rayonunun hüquq mühafizə orqanları tərəfindən həyata keçirilmiş istintaq və əməliyyat-axtarış tədbirləri nəticəsində rayon ərazisində baş vermiş ölümlə nəticələnən yol nəqliyyat hadisəsini törədərək hadisə yerindən qaçmış sürücü müəyyən edilərək istintaqa cəlb olunub.
Bakı şəhər prokurorluğu və Baş Polis İdarəsindən Trend-ə daxil olan birgə məlumata görə, fevralın 24-də saat 20:50 radələrində Bakı Metropoliteninin "Həzi Aslanov" stansiyası yaxınlığında naməlum avtomobilin sürücüsünün yol hərəkəti və nəqliyyat vasitələrinin istismarı qaydalarını kobud surətdə pozaraq yolu keçən piyada - 1954-cü il təvəllüdlü Əliyev Ruslan Hüseyn oğlunu vurub hadisə yerindən qaçması və sonuncunun aldığı xəsarətlərdən orada ölməsi faktına görə Xətai rayon Polis İdarəsinin İstintaq şöbəsində Cinayət Məcəlləsinin 263.2 (yol hərəkəti və nəqliyyat vasitələrinin istismarı qaydalarını pozma) və 264-cü (yol nəqliyyat hadisəsi yerindən qaçma) maddələri ilə cinayət işi başlanıb.
Aparılmış təxirəsalınmaz istintaq və əməliyyat-axtarış tədbirləri nəticəsində həmin yol nəqliyyat hadisəsinin "Ford Tranzit" markalı "90-XX-672" dövlət qeydiyyat nişanlı avtomobilin sürücüsü Bakı şəhər sakini, 1981-ci il təvəllüdlü Bakerov Vaqif Anatolyeviç tərəfindən törədilməsi müəyyən edilib.
Cinayətin törədilməsində şübhəli bilinən Bakerov tutularaq istintaqa cəlb olunub.
Hazırda iş üzrə istintaq davam etdirilir.