Azərbaycan, Bakı, 25 oktyabr / Trend, müxbir X.Murtuzayeva/
Hong Kongda Kung Fu və kino əfsanəsi Brus Linin bir zamanlar yaşadığı ev satışa çıxarılacaq. Bu barədə Trend Türkiyənin "Hürriyət" qəzetinə istinadən xəbər verir.
Mülkün hazırki sahibi Yu Panglin evin muzeyə çevrilməsi üçün hökumətlə aparılan danışıqların uğursuzluqla nəticələnməsindən sonra onu satmağı qərara alıb. 90 yaşlı milyarderin sözlərinə görə, hökumət dəstək vermədiyi üçün artıq evi muzeyə çevirməyi düşünmür. O, binaya 180 milyon Hong Kong dolları (23 milyon ABŞ dolları) dəyərində qiymət qoyub.
Qeyd edək ki, 1973-cü ildə 32 yaşında dərman zəhərlənməsi nəticəsində həyatını itirən Brus Linin Hong Kongun lüks rayonlarından birindəki evindən hazırda hotel kimi istifadə edilir.