Azərbaycan, Bakı, 21 fevral / Trend , müxbir S.İlhamqızı/ Azərbaycanın QHT nümayəndələrinin mart ayında Ermənistana və işğal altında olan Dağlıq Qarabağa gözlənilən səfəri Hollandiya hökuməti tərəfindən təşkil olunur və yalnız səfər iştirakçılarının yol xərcinin ödənilməsi nəzərdə tutulub. Bu barədə səfərin təşkilatçılarından olan, Helsinki Vətəndaş Assambleyası Azərbaycan Milli Komitəsinin rəhbəri Arzu Abdullayeva məlumat verib.
Azərbaycanın bir qrup QHT nümayəndəsi, hünuq müdafiəçisi martda Ermənistanda keçiriləcək "Avrointeqrasiya çərçivəsində münaqişələrin həlli perspektivləri" mövzusunda konfransda iştirak edəcək və ondan sonra oradan Qarabağa gedəcək.
Qarabağ Azadlıq Təşkilatı bu gün bəyanat yayaraq, səfərə hazırlaşanları vətənə xəyanətdə, qazanc məqsədilə ermənilərlə iş birliyi qurmaqda günahlandırıb.
Məsələyə aydınlıq gətirən Abdullayeva bildirib ki, Beynəlxalq Helsinki Vətəndaş Assambleyasının mərkəzi ofisi Hollandiyada yerləşir və Ermənistanda keçirilməsi nəzərdə tutulan tədbir də məhz bu qurumun təşkilatçılığı ilə baş tutacaq.
"Bəllidir ki, Hollandiya Qarabağ məsələsində hər hansı bir marağı olan tərəf deyil və hökumətin yeganə məqsədi konfliktlərin sülh yolu ilə tənzimlənməsidir. Bu baxımdan, Qarabağa səfərimizə heç cür don geyindirmək, vətəndaş cəmiyyətinin gördüyü işlərə kölgə salmaq mümkün deyil" - deyə Abdullayeva bildirib.