Azərbaycan, Bakı, 23 may / Trend , müxbir S.Ağayeva/ Ermənistan-Azərbaycan Dağlıq Qarabağ münaqişəsinin həlli açarı Rusiya, ABŞ və Avropa İttifaqının (Aİ) əlindədir. Azərbaycan Avropa üçün öz cəlbedici enerji ehtiyatlarından istifadə edərək Aİ-ni münaqişənin həlli prosesinə qoşulmağa vadar etməlidir. Bu barədə cümə günü Trend -a tanınmış almaniyalı politoloq İohan Rau bildirib.
"Azərbaycan prezidenti İlham Əliyev hər gün ciddi və inadlı şəkildə Ermənistan-Azərbaycan münaqişəsinin hərbi yolla həlli imkanları barədə danışmalıdır. Bu Aİ-ni çətinliyə salacaq və o, Azərbaycanın enerji resursları hesabına təmin edilməsi planlaşdırılan enerji təhlükəsizliyinin qayğısına ciddi şəkildə qalmağa başlayacaq" - deyə Almaniyanın Silahlı Qüvvələr Akademiyası nəzdində Beynəlxalq Təhlükəsizlik Forumunun üzvü bildirib.
İki Cənubi Qafqaz ölkəsiarasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının 20%-i, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə hələ ki nəticəsiz sülh danışıqları aparılır.
Raunun sözlərinə görə, Aİ hazırda yalnız neft və qaz barədə düşünür, çünki bir çox ölkələrdə neft ehtiyatları tükənmək üzrədir. Azərbaycan isə Avropa üçün enerji resurslarının tranzitində qlobal oyunçudur. "Azərbaycan Aİ üçün regionda nəhəg neft və qaz ehtiyatları olan "Mühüm qapıdır" və regionda hərbi əməliyyatların başlanması Avropa İttifaqı üçün olduqca təhlükəlidir" - deyə politoloq bildirib.
Politoloq hesab edir ki, Azərbaycan Ermənistan tərəfindən işğala məruz qalan və ərazilərinin 20 faizini itirən dövlət kimi hər gün ideoloji və təbliğat üsullarından istifadə edərək hərbi əməliyyatların başlanma ehtimalları barədə bəyanatlar verməli və bu yolla da münaqişənin ədalətli həllinə nail olmalıdır.
Birbaşa danışıqların bu günə qədər olduğu kimi Ermənistanla deyil, hakimiyyətin son zamanlar tez-tez səsləndirdiyi "Dağlıq Qarabağ Respublikası" kimi adlandırılan Dağlıq Qarabağla aparılması imkanları barədə danışan Rau qeyd edib ki, Azərbaycan bu addımı atmamalıdır. "Bu, rəsmi Bakı üçün faydalı olmayacaq. Azərbaycan öz ərazilərinin bir hissəsi ilə danışıqlar aparmamalıdır, əks təqdirdə, bu onun məğlubiyyəti ilə nəticələnəcək" - deyə bildirib.
Məqalə müəllifi ilə əlaqə ünvanı: trend
