Azərbaycan, Bakı, 09 fevral/ Trend , müxbir E.Rüstəmov/ Britaniyanın LINKS Qeyri-Hökumət Təşkilatının icraçı diretoru hesab edir ki, Ermənistan-Azərbaycan münaqişəsinin nizamlanmasında Rusiyanın vasitəçi kimi rolu qərəzsiz və ədalətli olarsa səmərəli ola bilər.
LINKS Qeyri-Hökumət Təşkilatının icraçı diretoru Denis Sammut bazar ertəsi Trend -a bildirib ki, Rusiya ATƏT-in Minsk Qrupunun həmsədri kimi bu rolda yalnız qərəzsiz və ədalətli vasitəçi kimi qəbul olunacağızaman səmərəli ola bilər.
"Eyni sözlər ATƏT-in Minsk Qrupunun həmsədri olan digər iki dövlətə - Fransa və ABŞ-a da aiddir. Onlar uğur əldə etmək istəyirlərsə hər iki tərəfin etibarından istifadə etməlidirlər",- deyə Sammut bildirib.
Dağlıq Qarabağ və ona bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri, ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə, hələ ki nəticəsiz, sülh danışıqları aparılır.
"Mən kütləvi informasiya vasitələrində Rusiyanın Ermənistana silah tədarük etməsi ilə bağlı infolrmasiya oxudum. Mən buna heç cür inana bilmirəm - həm ruslar, həm də ermənilər bunu təkzib edirlər. Hətta Rusiya hökuməti silah tədarük etmədiyi halda belə,onlar Azərbaycan ictimaiyyətini sakitləşdirməlidirlər", - deyə Sammut vurğulayıb.
Bəzi kütləvi informasiya vasitələri bu yaxınlarda Rusiyanın Ermənistana Gümrüdəki 102 saylı hərbi bazasından təqribən 800 mln. dollar həcmində silah və hərbi texnika verməsi barədə informasiya yayıb. Rusiyanın Azərbaycandakı səfiri Vasili İstratov vəziyyətin aydınlaşdırılması üçün Azərbaycanın Xarici İşlər Nazirliyinə dəvət olunub. Daha sonra Rusiya Federasiyasının Müdafiə və Xarici İşlər Nazirlikləri Yerevana Rusiya silahlarının tədarük edilməsi ilə bağlı yayılan informasiyaları təkzib edib. Lakin Bakı Moskvanın cavabından narazı qalıb. İki ölkənin xarici işlər nazirləri arasında baş tutan telefon söhbəti zamanı bu məsələ ilə bağlı məsləhətləşmələrin aparılması qərara alınıb.
Məqalə müəllifi ilə əlaqə ünvanı - [email protected]
