Rusiya Dağlıq Qarabağ münaqişəsinin həllində fəal iştirak edir. Bunu cümə günü Rusiya Federasiyası XİN-in rəsmi nümayəndəsi Andrey Nesterenko deyib. Məlumatı "Vesti" telekanalı yayıb.
"Dağlıq Qarabağ münaqişəsini ATƏT-in Minsk qrupunun həmsədrləri və maraqlanan tərəflər lazımi dərəcədə müzakirə edir və burada Rusiya da fəal iştirak edir", - Nesterenko deyib.
Onun sözlərinə görə, münaqişə xüsusi xarakter daşıyır, belə ki, münaqişənin bir çox incə tərəfləri var.
"Dağlıq Qarabağ münaqişəsi üzrə daim danışıqlar və məsləhətləşmələr aparılır", - o əlavə edib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Baş Assambleyasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.