Azərbaycan, Bakı, 14 iyun /Trend/
Avropa Parlamentinin Xarici əlaqələr komitəsi iyunun 15-də ATƏT-in Minsk qrupunun həmsədrlərinin iştirakı ilə Dağlıq Qarabağdakı vəziyyətlə bağlı dinləmələr keçirəcək. Trend-in məlumatına görə, bu barədə "Mediamaks" agentliyi məlumat yayıb.
Dinləmələrdə amerikalı və fransalı vasitəçilər Robert Bradtke və Bernar Fasye, ATƏT-in fəaliyyətdə olan sədrinin şəxsi nümayəndəsi Anji Kaspşik, Aİ-nin Cənubi Qafqaz üzrə keçmiş xüsusi nümayəndəsi Piter Semnebi, Aİ-nin Avropa Xarici İşlər Xidmətinin Rusiya, Şərq Qonşuluğu və Qərbi Balkan məsələləri üzrə direktoru Miroslav Layçek çıxış edəcəklər.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.