Azərbaycan, Bakı, 20 yanvar /Trend, müxbir Cəmilə Cəfərova/
Latviya hesab edir ki, Ermənistan-Azərbaycan, Dağlıq Qarabağ münaqişəsi sülh yolu ilə həll olunmalıdır. Bu barədə Latviyanın xarici işlər naziri Edqars Rinkeviç Trend-ə müsahibəsində deyib.
Diplomat qeyd edib: "Latviya əmindir ki, bu uzun sürən münaqişə yalnız sülh yolu ilə və beynəlxalq hüquq normalarına uyğun həll olunmalıdır".
Nazirin sözlərinə görə, Latviya Avropa İttifaqında sədrliyi çərçivəsində ATƏT-in Minsk qrupunun münaqişənin nizamlanması üzrə fəaliyyətini tamamilə dəstəkləyir.
E.Rinkeviç, həmçinin münaqişənin həlli prosesində Azərbaycanla Ermənistan arasında birbaşa təmasların vacibliyini qeyd edib.