Azərbaycan, Bakı, 22 fevral / Trend , müxbir İ.Əlizadə/ Azərbaycan Parlamentinin deputatları həbsdə olan jurnalistlərin azadlığa buraxılmasını tələb edirlər. "Həbsdə olan jurnalistlər dərhal və qeyri-şərtsiz azadlığa buraxılmalıdırlar" - deyə Milli Məclisin cümə günü keçirilən iclasında müxalifətyönlü Müsavat deputat qrupunun üzvü Pənah Hüseyn bildirib.
Hazırda Azərbaycanda üç jurnalist həbsdədir. Onlar "Azadlıq" qəzetinin baş redaktoru Qənimət Zahid, həmin qəzetin əməkdaşı Zahidin qardaşı Mirzə Sakit və "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayevdir.
Hüseyn qeyd edib ki, "Azadlıq" qəzetinin baş redaktoruna dövlət ittihamçısı tərəfindən 5 il iş istənilməsi Azərbaycan üçün biabırçılıqdır.
Deputat Cəmil Həsənli isə qeyd edib ki, Zahidin məhkəmə prosesində iştirak edib: "Qənimət Zahidin məhkəməsi tam qurmadır və Azərbaycanı rüsvay edir. Həbsdə olan jurnalistlərin ikisi bir ailənin üzvüdür. Jurnalistlər dərhal azadlığa buraxılmalıdır".