Azərbaycan, Bakı, 10 mart / Trend , müxbir D.Xatınoğlu / İran BMT Təhlükəsizlik Şurasının (T Ş) nüvə proqramına dair 4-cü Qətnaməsinin qəbulunu ləngitmək üçün Avropa ilə müzakirə planını irəli sürüb. "İranın Avropa ilə nüvə planına dair müzakirələri vaxt qazanmaq üçündür"-deyə, Almaniyada fəaliyyət göstərən iranlı politoloq Həsən Şəriətmədari Trend a bildirib.
İran XİN rəhbəri Mənuçehr Müttəki martın 9-da mətbuat konfransında bildirib ki, Avropa Birliyinin İranın nüvə proqramına dair əməli təklifi olsa, rəsmi Tehran həmin çərçivədə müzakirəyə hazırdır. İran prezidenti Mahmud Əhmədinejad isə, martın 6-da bildirmişdi ki, İran nüvə məsələsində yalnız MAQATE ilə müzakirə aparacaq və bu məsələdə yalnız bu təşkilatı rəsmən tanıyır.
Beynəlxalq əlaqələr üzrə ekspert Şəriətmədari bazar ertəsi Berlindən telefonla Trend a bildirib ki, İranın uranın zənginləşdirilməsi planını dayandıracağı ehtimal olunmur. "Dünya ictimaiyyəti İrandan uranın zənginləşdirilməsini dayandırmağı tələb edib və BMT TŞ-nin ölkə əleyhinə hər üç Qətnaməsi buna görə qəbul olunub. Rəsmi Tehranın uranın zənginləşdirilməsini dayandıracağı isə, inanılmazdır. İran indiyədək yürütdüyü xarici siyasətin dalana dirəndiyini başa düşüb və buna görə müzakirəni qəbul edib" - deyə, İranlı politoloq bildirib.
Şəriətmədarinin fikrincə, Rusiya strateji təhlükəyə görə İrandan uzaqlaşmağa çalışır və bu ölkəni dəstəkləməkdən artıq çəkinir. O, bildirib ki, İrana 2 ay yarım vaxt verilib ki, uranın zənginləşdirilməsini dayandırsın. "İran isə, Avropa ilə nüvə planına dair müzakirələri əlavə vaxt qazanmaq üçün həyata keçirmək istəyir. BMT T Ş-nin İran əleyhinə 4-cü Qətnaməsi daha sərt olacaq"-deyə, Şəriətmədari bildirib.
BMT Təhlükəsizlik Şurası martın 3 - də İrana qarşı üçüncü Qətnamə qəbul edib.
BMT TŞ İrandan uranı zənginləşdirilməsini dayandırmağı tələb edib. 2003-cü ildən etibarən, üç il müddətində rəsmi Tehran uranın zənginləşdirilməsi planını dayandırsa da, 2006-cı ildən plan yenidən işləyir. BMT TŞ bu səbəbdən İran əleyhinə 3 Qətnamə qəbul edib. 3-cü Qətnamədə, İranın nüvə planı ilə əlaqədar 13 rəsmisinin xaricə səfərinə və 13 şirkətlə iqtisadi əlaqəyə qadağa qoyulub. Həmçinin, xarici şirkətlərin İranın "Melli" və "Saderat" bankları ilə iqtisadi əlaqələrdə daha diqqətli olmağa, ölkəyə idxal olunan mallara kredit verməkdə, sığortalamada ehtiyatlı olmağa çağırıb. İrana idxal olunan yüklərin nəzarətdən keçirilməsi xüsusi vurğulanıb.
