Azərbaycan, Bakı, 11 aprel / Trend , müxbir Q.Cəbiyev/ Azərbaycanın iqtidaryönlü Ana Vətən Partiyası (AVP) hesab edir ki, müxalifətin mövcud reallığı dəyişmək imkanları mümkün deyil. "Qarşıdakı qısa bir dönəmdə kiminsə qeyri-rasional addımları sayəsində Azərbaycan həyatının kardinal şəkildə dəyişməsi qeyri-mümkündür. Dəyişikliklər baş verəcəksə, bu, hakimiyyətin daha artıq güclənməsi, öz resurslarını səfərbər etməsi, mövcud problemlərin daha səylə aradan qaldırılması səviyyəsində baş verəcək" cümə günü Trend a AVP-nin sədr müavini, millət vəkili Zahid Oruc deyib.
Azərbaycanda prezident seçkisi oktyabrın 15-də keçiriləcək. Seçkidə iştirak qərarı verən müxalif Müsavat və Demokrat partiyaları seçki kampaniyası zamanı hakimiyyətə qarşı alternativ uğurlu platforma təqdim edəcəklərini açıqlayıb.
Oruc vurğulayıb ki, seçki dönəmində hakimiyyət daha da güclənəcək. "Müxalifət isə cəmiyyətin diqqətini cəlb edə biləcək platforma tapa bilməməsi, vahid liderlə çıxış etməməsi, olan-qalan strukturlarını bir araya gətirə bilməməsi səbəbindən daha da zəifləyəcək" - AVP sədrinin müavini əlavə edib.
Onun fikrincə, müxalifət seçkidə ikinci yer uğrunda mübarizə aparacaq. Çünki Azərbaycan prezidentinin daşıdığı baxışlar sistemi, Qərblə bu dönəmdə yürütdüyü siyasət, regionda Azərbaycanın formalaşdırdığı güc bütövlükdə İlham Əliyevin prezident olmasını bir daha zəruri edir.
Məqalə müəllifi ilə əlaqə ünvanı: [email protected]