Azərbaycan, Bakı, 26 may/ Trend , müxbir E.Babayev/ Azərbaycan Milli Məclisində Seçki Məcəlləsinə əlavə və dəyişikliklərin müzakirəsi zamanı müxalifətin etirazlarının nəzərə alınacağı az ehtimal olunandır. "Çox böyük ehtimalla, hər hansı fövqəladə hadisə olmasa, Milli Məclis əlavə və dəyişiklikləri qəbul edəcək" - bazar ertəsi Trend a Milli Məclisdə müxalifəti təmsil edən "Müsavat" deputat qrupunun üzvü, millət vəkili Pənah Hüseyn deyib.
Trend un arayışı: Seçki Məcəlləsinə əlavə və dəyişiklikləri nəzərdə tutan layihənin mayın 30-da Milli Məclisdə qəbulu gözlənilir. Dəyişikliklər sırasında dövlət KİV-də təbliğatın qadağan olunması, namizədlər üçün depozitin 33 min manatdan 300 min manata qaldırılması, İnzibati Xətalar Məcəlləsinin tətbiqi nəticəsində, namizədliyin qeydiyyatının ləğvinin sadələşdirilməsi kimi məsələlərin yer alması müxalifətin narazılığına səbəb olub və partiyalar daxilində boykota meyl artıb.
Hüseyn vurğulayıb ki, dəyişikliklər onsuz da pis olan vəziyyəti bir az da pisləşdirir. "Dəyişikliklərin qəbulu Azərbaycanda seçkiqabağı mühitlə bağlı narazılıqları artıracaq" - deyən millət vəkili bildirib ki, layihənin müzakirəsi zamanı müxalif millət vəkilləri namizədlər üçün depozitin 33 min manatdan 300 min manata qaldırılması, İnzibati Xətalar Məcəlləsinin tətbiqi nəticəsində, namizədliyin qeydiyyatının ləğvinin sadələşdirilməsi kimi məsələlərə ciddi şəkildə etiraz edəcəklər. "Bizim özümüzün hazırladığımız layihə var. Həmin layihə Milli Məclisin Hüquq siyasəti və dövlət quruculuğu komissiyasının iclasında müzakirə edilsə də, Milli Məclisə göndərilmək üçün qəbul edilmədi. Amma bu əsas verə bilməz ki, həmin layihə müzakirə olunmasın. Biz həmin layihənin müzakirəsinə çalışacağıq" - deyə o vurğulayıb.
Azərbaycanın hakim Yeni Azərbaycan Partiyasının (YAP) icra katibinin müavini, millət vəkili Mübariz Qurbanlı isə, Trend a bildirib ki, müxalifətin iddiaları əsassızdır. Dəyişikliklər seçki mühitinin daha da demokratikləşməsinə xidmət edir və beynəlxalq təcrübəyə əsaslanır. "Seçki kampaniyasının azaldılması məsələsinə gəldikdə isə, biz bu məsələdə israr edəcəyik. Dünyanın heç bir yerində seçki kampaniyasına 120 gün vaxt ayrılmır" - deyə Qurbanlı əlavə edib.
YAP Milli Məclisdə 64 millət vəkili ilə təmsil olunur, "Müsavat" deputat qrupuna isə, 5 millət vəkili daxildir.
Məqalə müəllifi ilə əlaqə ünvanı: [email protected]
