Azərbaycan, Bakı, 20 iyun/ Trend , müxbir E.Babayev/ Müxalif Azərbaycan Demokrat Partiyasının (ADP) prezident seçkisində iştirak qərarını dəyişməsi ehtimalı artır. "Belə getsə, seçkiyə getməyin mənası qalmır və mən partiyada boykot tərəfdarı olanları başa düşürəm" - bunu cümə günü Trend -a ADP sədri Sərdar Cəlaloğlu deyib.
Trend -un arayışı: İyunun 2-də Milli Məclisin qərarı ilə Seçki Məcəlləsində bir sıra dəyişikliklər edilib. Seçki kampaniyasının müddəti 120 gündən 75 günə endirilib. 75 günün 28-i təşviqat işlərinə, qalan günlər namizədin müəyyən edilməsi, onun qeydə alınması üçün imzaların toplanması, imzaların Mərkəzi Seçki Komissiyası tərəfindən yoxlanması və digər prosedur tədbirlərinə sərf olunacaq. Namizədin dəstəklənməsi üçün lazım olan imzaların sayı, əvvəllər olduğu kimi, 45 min yox, 40 min müəyyən edilib, dövlət KİV-də seçki təbliğatı qadağan olunub. Məcəlləyə əsasən, özəl televiziyalarda siyasi reklam "Televiziya və radio yayımı haqqında" Qanuna uyğun həyata keçirilməlidir.
Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. İqtiadaryönlü Ana Vətən və Sosial Rifah partiyaları da seçkidə İlham Əliyevin namiəzdliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə bəyanat verib.
Cəlaloğlu bildirib ki, hazırda partiya Seçki Məcəlləsinə əlavə və dəyişikliklərin ölkə başçısı tərəfindən təsdiqlənməsini gözləyir. "ADP-də seçki hazırlıqları, demək olar ki, dayandırılıb və köhnə işlər istisna olmaqla, hər hansı yeni iş aparılmır" - deyən Cəlaloğlunun sözlərinə görə, seçki qanunvericiyli qüvvəyə mindikdən sonra, partiyada müzakirələr aparıb yekun qərar verəcəyik. " Boykot qərarı versək, "Azadlıq" bloku ilə əməkdaşlıq etməyəcəyik. Hazırda belə bir məsələ partiyada nəzərdən keçirilmir. Gələcəkdə isə, hər şey mümkündür" - deyə o qeyd edib.
Sağ təmayüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya bu ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq, keçmiş sədr Rəsul Quliyev və tərəfdarları ADP-dən imtina edib, özlərinin Açıq Cəmiyyət Pariyasını yaradıblar.
Məqalə müəllifi ilə əlaqə ünvanı: [email protected]
