Azərbaycan, Bakı, 29 iyul/ Tr , müxbir E.Babayev/ Azərbaycan müxalifətinin seçkidə iştirak etmək niyyətində olan təmsilçiləri öz qərarlarını dəyişməyəcəklər. "Mənim seçkidə iştirak qərarımı dəyişmək niyyətim yoxdur", - deyə çərşənbə axşamı Trend -a "Azərbaycan Naminə" İctimai Forumun rəhbəri Eldar Namazov bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə qərar verib. Vətəndaş Həmrəyliyi, Kommunist, Böyük Quruluş, Demokratik İslahatlar partiyaları isə seçkidə öz namizədləri ilə çıxış etməyəcəklər.
Hələ bu ilin əvvəllərindən seçkidə iştirak edəcəklərini bəyan edən Müsavat və Demokrat partiyaları isə avqustun 2-də seçkidə iştirak edib-etməməklə bağlı yekun qərarlarını açıqlayacaqlar. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir.
Namazov bildirib ki, o, seçkidə iştirakın tərəfdarıdır. "Həmişə çalışıram ki, inandığım yolla gedim. Məndə daxili əminlik var ki, seçkidə iştirak düzgün yoldur. Doğru hesab etdiyim qərarın dəyişməsinə kənar amillər təsir edə bilməz", - deyən Namazov qeyd edib ki, müxalifətin əhəmiyyətli hissəsinin seçkiyə qoşulmaması yeni vəziyyət yaradıb. "Biz yaxın günlərdə bu vəziyyəti təhlil edib, öz dəyərləndirməmizi ortaya qoyacağıq. Bu dəyərləndirmənin nədən ibarət olacağını isə indidən söyləmək tezdir", - deyə o əlavə edib.
Yaşıllar Partiyasının sədri Mais Güləliyev də çərşənbə axşamı Trend -a bildirib ki, seçkidə sona qədər iştirak edəcək. "Bizim qətiyyən qərarımızı dəyişmək fikrimiz yoxdur", - deyən Güləliyev bildirib ki, partiya hələ may ayından seçkiyə hazırlaşır və geri çəkilmək fikrində deyillər.
Bütöv Azərbaycan Xalq Cəbhəsi Partiyasının sədri Qüdrət Həsənquliyev isə deyib ki, hələlik partiyanın qərarı seçkidə sona qədər iştirak etməkdir.
Müasir Müsavat Partiyasının sədri Hafiz Hacıyev də seçkidə sona qədər iştirak edəcəyini vurğulayıb.
Məqalə müəllifi ilə əlaqə ünvanı: [email protected]
