Azərbaycan, Bakı, 06 avqust / Trend , müxbir İ.Əlizadə/ Azərbaycan müxalifətini təmsil edən dini yönümlü İslam Partiyası təşkilatı dövlət qeydiyyatına almadığına görə, Ədliyyə Nazirliyini məhkəməyə verəcək. "Bir müddət də gözlədikdən sonra partiyanın dövlət qeydiyyatı problemini həll etmək üçün məhkəməyə müraciət edəcəyik", - deyə çərşənbə günü Trend -a açıqlamasında İslam Partiyasının sədri Möhsün Səmədov bildirib.
Trend -un arayışı: Dini təmayüllü, müxalifətyönlü İslam Partiyası 1991-ci ilin avqustunda təsis olunub, 1992-ci ildə Ədliyyə Nazirliyində qeydiyyata alınıb. 1995-ci ildə partiya sədri və müavini İrana cəsusluq etməkdə ittiham olunaraq həbs ediliblər. Bu faktı əsas götürən Azərbaycan Ali Məhkəməsi partiyanın dövlət qeydiyyatını ləğv edib.
Səmədov qeyd edib ki, partiyanın dövlət qeydiyyatına alınması üçün sənədləri xeyli müddət əvvəl Ədliyyə Nazirliyinə təqdim ediblər.
"Nazirlikdən aldığımız cavabda bildirilirdi ki, sənədlərdə iki texniki çatışmazlıq var. Onları da aradan qaldırdıq və sənədləri yenidən nazirliyə təqdim etdik. Lakin bir neçə aydır ki, bizə heç bir cavab verilməyib", - deyə partiya sədri əlavə edib.
Səmədov bildirib ki, Ədliyyə Nazirliyinin partiyanı dövlət qeydiyyatına almamasının səbəbləri onlara məlum deyil.
O qeyd edib ki, Azərbaycan məhkəmələrində partiyanın qeydiyyatı məsələsini həll edə bilməsələr, İnsan Hüquqları üzrə Avropa Məhkəməsinə müraciət etmələri də mümkündür.
Ədliyyə Nazirliyindən məsələyə münasibət öyrənmək mümkün olmayıb.
Məqalə müəllifi ilə əlaqə ünvanı: [email protected]