Azərbaycan, Bakı, 15 avqust / Trend , müxbir E.Babayev/ Azərbaycanın müxalif Ümid Partiyası hesab edir ki, prezident seçkilərində müxalifətin böyük qisminin iştirak etməməsi faktı beynəlxalq qurumların seçki ilə bağlı mənfi rəy verməsinə gətirib çıxarmayacaq.
"Qəti şəkildə deyə bilərəm ki, beynəlxalq qurumların rəylərində bu seçkinin alternativsiz şəraitdə keçməsi barədə hər hansı fikir yer almayacaq", cümə günü Trend -a adıçəkilən partiyanın prezidentliyə namizədi İqbal Ağazadə bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. İndiyə qədər 12 iddialı seçkiyə qoşulmaq üçün sənədlərini MSK-ya təqdim edib. Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi, Açıq Cəmiyyət, Müsavat, Vətəndaş Həmrəyliyi, Demokrat, Böyük Quruluş, Azadlıq partiyaları, o cümlədən "Azərbaycan Naminə" İctimai Forumun rəhbəri Eldar Namazov isə seçkidə iştirakdan imtina ediblər.
Seçkidə iştirak etməyən partiyalar hesab edir ki, onların seçkilərə qoşulmaması prosesin alternativsiz şəraitdə keçməsi barədə rəylərin verilməsinə gətirib çıxaracaq.
Ağazadə bildirib ki, beynəlxalq qurumlar mütəmadi olaraq seçkilərlə bağlı Ümid Partiyası ilə məsləhətləşmələr aparırlar, partiyanın mövqeyini öyrənirlər. "Ola bilsin ki, beynəlxalq qurumlar öz rəylərində "bu seçkidə müxalifətin böyük qismi iştirak etmədi", deyə mövqe ifadə etsinlər. Ancaq seçki alternativsiz şəraitdə keçdi və heç bir müxalifət namizədi seçkidə iştirak etmədi tipli bəyanat verilməyəcək", - deyən Ağazadə seçkiyə qoşulmayan həmkarlarının yanaşmasını doğru saymır. "Kimsə iştirak etmədiyi seçkini alternativsiz hesab edirsə, bu, bir qədər yaxşı səslənmir və doğru yanaşma deyil. Hesab edirəm ki, narazı elektorat məni hakimiyyətin namizədinə alternativ görəcək. Bu elektoratın tək namizədi mənəm və kimin necə düşünməyindən asılı olmayaraq, doğru bildiyimiz yolla gedəcəyik", - deyən Ağazadə güman edir ki, əksər müxalifət partiyalarının seçkiyə qoşulmaması seçici fəallığınıa da təsiri etməyəcək.
Müxalifəti təmsil edən Ümid Pariyası 1993-cü ildə yaradılıb. 2002-ci ildə Vətəndaş Birliyi Partiyası (VBP) Ümid Pariyasına birləşib. VBP-nin sədri olmuş Ağazadə Ümid Partiyasına sədr seçilib. Ağazadə Milli Məclisin deputatıdır.
Məqalə müəllifi ilə əlaqə ünvanı: [email protected]