Azərbaycan, Bakı, 15 sentyabr / Trend , müxbir İ.Əlizadə/ Azərbaycanın iki siyasi təşkilatı - hakimiyyətyönlü Demokratik Azərbaycan Dünyası və müxalifəti təmsil edən Böyük Millət partiyaları birləşmək haqqında razılığa gəliblər.
"Hər iki partiyanın rəhbərliyi birləşməyə tərəfdardır və bizim siyasi -ideoloji baxışlarımızda fikir birliyi var" - bazar ertəsi Trend -a Böyük Millət Partiyasının sədri Samir Adıgözəlov bildirib.
Trend - un arayışı: Hakimiyyətyönlü Demokratik Azərbaycan Dünyası Partiyası (DADP) 1992-ci ildə təsis olunub və 1993 - cü ildə Ədliyyə Nazirliyi tərəfindən dövlət qeydiyyatına alınıb. Təşkilata Məmməd Əlizadə rəhbərlik edir. Partiya 1993 - cü ildə hakimiyyətə gələn Yeni Azərbaycan Partiyasının siyasətini dəstəkləyir.
Müxalifəti təmsil edən Böyük Millət Partiyası 1999 - cu ildə yaradılıb.
Adıgözəlov deyib ki, o, Məmməd Əlizadənin sədrliyini qəbul etməyə razıdır.
DADP sədri Məmməd Əlizadə məlumatı təsdiq edib. "Böyük Millət Partiyasının rəhbərliyi birləşmək üçün bizə müraciət edib. Məsələni partiyanın Siyasi Şurasında müzakirə etdik. Siyasi Şura birləşməyə razılıq verdi" - Əlizadə əlavə edib.
Onun sözlərinə görə, DADP-nin Nizamnaməsi qrup şəkilində birləşməyə razılıq vermir. Ona görə də Böyük Millət Partiyasının üzvləri fərdi şəkildə DADP-yə qəbul olunacaqlar.
"Bu birləşməni partiyamızın sosial bazasının genişləndirilməsi üçün atılan addım kimi qiymətləndirmək olmaz. Çünki bizim kifayət qədər sosial bazamız var. Lakin cəmiyyət siyasi partiyaların birləşməsini vacib hesab edir. Samir Adıgözəlov birləşmiş partiyanın sədr müavini vəzifəsini tutacaq. Təşkilatın adı isə Demokratik Azərbaycan Dünyası Partiyası olacaq".
Əlizadə qeyd edib ki, partiyaların birləşməsi haqqında sazişin bu həftə imzalanması planlaşdırılıb.
Məqalə müəllifi ilə əlaqə ünvanı: [email protected]
