Azərbaycan, Bakı, 04 noyabr / Trend , müxbir İ.Əlizadə / Azərbaycanın Ermənistan Silahlı Qüvvələri tərəfindən işğal olunan Xocalı şəhərində erməni hərbi birləşmələrinin azərbaycanlılara qarşı törətdiyi soyqırım qurbanlarının ailə üzvlərinə və faciə zamanı zərər çəkənlərə dövlət tərəfindən təzminat verilə bilər.
"Parlamentə təqdim olunan "Xocalı faciəsinin soyqırım kimi tanınması haqqında" qanun layihəsində soyqırım qurbanlarının yaxınlarına və faciədən zərərçəkənlərə təzminat verilməsi nəzərdə tutulub", - çərşənbə axşamı Trend -a qanun layihəsinin müəllifi, parlamentin Təhlükəsizlik və müdafiə məsələləri daimi komissiyasının üzvü Zahid Oruc bildirib.
Trend - un arayışı: 1992 - ci il fevralın 26 - da Ermənistan hərbi birləşmələri yeddi min əhalisi olan Xocalı şəhərində genosid aktı həyata keçirib. Ermənistan hərbi birləşmələrinin şəhərə hücumu zamanı burada yalnız üç minə yaxın insan qalmışdı. Çünki, 4 aydan artıq vaxt ərzində blokadada olan əhalinin xeyli hissəsi şəhərdən çıxmaq məcburiyyətində qalmışdı. Xocalı soyqırımı zamanı 613 nəfər - 106 nəfər qadın, 63 azyaşlı uşaq, 70 qoca - ödürülüb, 1000 nəfər müxtəlif yaşlı dinc sakin aldığı güllə yarasından əlil olub. 8 ailə tamamilə məhv edilib, 25 uşaq hər iki valideynini, 130 nəfər valideynlərindən birini itirib. Faciə baş verən gecə 1275 nəfər dinc sakin girov götürülüb, girov götürülənlərdən 150 nəfərin taleyi indi də məlum deyil.
Oruc bildirib ki, Xocalı soyqırımı ilə bağlı bir sıra məsələlərin qanunvericilik norması kimi qəbul olunması zərurəti var.
"Qanun layihəsində Xocalı faciəsinin soyqırım kimi tanınması, bunun hüquqi nəticələri, faciə zamanı zərərçəkənlərin soyqırım qurbanları kimi tanınması, onların şəhidlərdən ayrılması, soyqırıma ictimai münasibətin sanksiyalaşdırılması, bununla bağlı məsələlərin tarixiləşdirilməsi nəzərdə tutulub ", - deyə deputat əlavə edib.
Onun sözlərinə görə, qanun layihəsinə əsasən, icra hakimiyyəti orqanları soyqırım qurbanlarına dəyən maddi və mənəvi ziyanı hesablamalı və onlara Ermənistanın təzminat ödəməsi ilə bağlı beynəlxalq məhkəmədə iddia qaldırmalıdır: "Eyni zamanda, soyqırım qurbanlarının ailə üzvlərinin sosial və mənəvi reabilitasiyası üçün mərkəzlərin yaradılması və onlara xüsusi müavinətların verilməsi nəzərdə tutulub".
Qanun layihəsinə əsasən, Xocalıya soyqırıma məruz qalan şəhər statusu veriləcək və bu, dövlət siyasətində nəzərə alınacaq. Qanun layihəsində Xocalı soyqırımını açıq şəkildə şühbə altına alanların və ya bunu dolayı vasitələrlə edənlərin, bununla bağlı hərəkət və hərəkətsizliyə yol verənlərin Cinayət Məcəlləsi ilə cəzalandırılması, 26 fevralda ictimai iaşə obyektlərində konsertlərin, şənliklərin, əyləncələrin keçirilməsinin, spirtli içkilərin verilməsinin qadağan olunması qeyd edilib.
Məqalə müəllifi ilə əlaqə ünvanı: [email protected]
