...

Azərbaycanın hakim partiyası keçmiş prezident və eks -spikerin vətənə qayıtması məsələsinin hüquqi müstəvidə həllinin tərəfdarıdır

Siyasət Materials 17 Dekabr 2008 18:26 (UTC +04:00)

Azərbaycan, Bakı, 17 dekabr/ Trend , müxbir A. Hüseynbala/ Azərbaycanın hakim partiyası keçmiş prezident Ayaz Mütəllibovun və eks - spiker Rəsul Quliyevin vətənə qayıtması məsələsinin hüquqi müstəvidə həllinin tərəfdarıdır.

"Onların xaricdə mühacirətdə olması yalandır, həm eks - prezident, həm də eks - spiker Azərbaycandan qaçıblar" - çərşənbə günü Trend - a hakim Yeni Azərbaycan Partiyası (YAP) icra katibinin müavini, deputat Siyavuş Novruzov bildirib.

Trend - un arayışı: Ayaz Mütəllibov 1991-1992 - ci illərdə Azərbaycanın ilk prezidenti olub. 1993-cü ilin mayında Azərbaycan Xalq Cəbhəsi hakimiyyətə gələndən sonra Rusiyaya mühacirət edib. Eks -prezident 16 ildir Moskvada yaşayır. Azərbaycan Sosial-Demokrat Partiyasının həmsədridir.

Rəsul Quliyev 1993 -1996 - cı illərdə Azərbaycan Milli Məclisinin sədri olub. 2006 - cı ilin sentyabrında istefa verərək, ABŞ - a mühacirət edib. Quliyev indi müxalif Açıq Cəmiyyət Partiyasının lideridir.

Novruzovun sözlərinə görə, Mütəllibovla Quliyev bu və ya digər şəkildə cinayət törədiblər.

"Hər ikisi barəsində Cinayət Məcəlləsinin müvafiq maddələri ilə Respublika Prokurorluğunda cinayət işi qaldırılıb. Onlar istədikləri vaxt Azərbaycana gələ bilərlər", - Novruzov vurğulayıb.

Hakim partiya funksioneri deyib ki, ölkəyə qayıdandan sonra həm eks - prezident, həm də eks -spiker hüquq - mühafizə orqanlarına tabe olmalı, məhkəmə qarşısında cavab verməlidirlər.

Onun fikrincə, məhkəmə bəraət verəcəksə, onlar azadlığa buraxılacaqlar. "Kimin nə deməsindən asılı olmayaraq, qanun hər bir insan üçün bərabərdir. Qanunu pozan jurnalist, deputat, nazir, prezident və eks -prezidentdirsə, buna fərq qoyulmamalıdır", - YAP rəsmisi bildirib.

YAP 1992 - ci ildə, o vaxt Naxçıvan Ali Məclisinin sədri vəzifəsində Heydər Əliyev tərəfindən yaradılıb. Azərbaycanda 15 ildən artıqdır hakim partiya olan YAP - ın indiki sədri prezident İlham Əliyevdir.

Məqalə müəllifi ilə əlaqə ünvanı: [email protected]

Xəbər lenti

Xəbər lenti