Azərbaycan, Bakı, 10 yanvar / Trend müxb. V.Javoronkova/ Ekspertlərin fikrincə, Qırğızıstan prezidenti administrasiyasının rəhbəri Mədət Sadırkulovun istefasının səbəbi respublika prezidentinin ətrafındakı ixtilafla əlaqədardır.
Bişkekdən Trend -a telefon vasitəsi ilə qırğız politoloqu Orozbek Moldaliyevin dediyinə görə, "Məsələ heç də Sadırkulovun postunu tərk etməsində deyil, hökumət daxilində klanların mübarizəsində və aralarındakı fikir ayrılığındadır".
Qırğızıstan prezidenti administrasiyasının rəhbəri cümə axşamı istefa ərizəsini yazıb, respublika prezidenti Kurmanbek Bakiyev isə istefanı qəbul edib.
Sadırkulov bir neçə yüksək vəzifələrdə çalışıb. Onların sırasında Qırğızıstanın birinci prezidenti Əsgər Akayevin administrasiyasının rəhbəri vəzifəsi də var. Hazırki administrasiyaya isə o, 2005-ci ildən başçılıq edir. Sadırkulov respublikanın ən nüfuzlu siyasətçilırindən sayılır.
Sadırkulovun jurnalistlərə dediyinə görə, məsul vəzifəni tərk etməsi onun şəxsi və könüllü qərarıdır.
Lakin ekspertlərin fikrincə, onun belə addım atmasının əsas səbəbi hökumətdəki ziddiyyətlərdir.
Qırğız politoloqu Beqiş Amatov hesab edir ki, Qırğızıstanın siyasəti və MDB-yə münasibəti dəyişir.
2008-ci ilin sonunda MDB dövlət başçılarının Qazaxstandakı qeyri-rəsmi sammitində prezident Bakiyev hazırki mərhələdə Rusyanın Qırğızıstan üçün ən etibarlı və münasib tərəfdaş olduğunu deyib. Bu ay isə Bakiyevin Moskvaya səfəri gözlənilir. Amatovun fikrincə, bu siyasi tendensiyaların Moskvanın xeyrinə dəyişməsindən xəbər verir. Ekspert indiyə kimi Qırğızıstanın ən əhəmiyyətli tərəfdaşının Rusiya deyil, Qazaxıstan olduğunu bildirir.
Qırğızıstanın sabiq deputatı, icmalçı Amatov deyir ki, "Sadırkulov məhz Qazaxıstanı dəstəklədiyi üçün tutduğu vəzifədən kənarlaşdırılıb".
Moldaliyevin sözlərinə görə, Sadırkulovun vəzifədən kənarlaşdırılmasının digər səbəbi hokumətdəki bir qrupun daxilində yaranmış ziddiyyətdir. "Sedep" tədqiqat mərkəzinin direktoru buna sübut kimi Sadırkulovun ardından baş nazirin müavini Elmira İbrahimovanın da vəzifədən getməsini göstərir.
Ekspert deyir ki, "bu hökumətdə mübarizə getməsini düşünməyə əsas verir".
Bundan əlavə, 2010-cu ildə Qirğızıstanda prezident seşkiləri keçiriləcək. Moldaliyevin fikrincə, bu fakt artıq indidən cinayət işlərinin açılmasına və dövlət başçısının ətrafında dəyişikliklərə zəmin yaradır.
Moldaliyev deyir ki, prezidenti administrasiyasının rəhbərinin istefasının hər hansı nəticələrə səbəb olmasını, məsələn, onun müxalifət düşərgəsinə keçməsini gözləməyə dəyməz: "Sadırkulov müxalifətə üz tutmayacaq, çünki onlar çoxdan ona qarşı çıxış edir və istefasını tələb edirdilər".
Materialın hazırlanmasında R.Məşədihəsənli (Bişkek) iştirak edib.
