Azərbaycan, Bakı, 13 iyul / Trend , müxbir E.Hüseynli /
Azərbaycan Parlamentinin komitə sədri Avropada təhlükəsizliyin hüquqi bazasının möhkəmləndirilməsi prosesində Dağlıq Qarabağ münaqişəsinin nizamlanmasına xüsusi yer ayrılmasını təklif edib.
"Avropada təhlükəsizlik sisteminin təkmilləşdirilməsinə böyük eytiyac var. Ermənistanın Azərbaycana qarşı yürütdüyü işğalçılıq siyasəti nəticəsində Dağlıq Qarabağ problemi ilə bağli BMT-nin qəbul etdiyi 4 qətnamə hələ də icra olunmayıb. ATƏT-in Minsk qrupu da bu sahədə heç bir effektli nailiyyət əldə edə bilməyib", - Trend -un məlumatına görə, bazar ertəsi Ukraynanın paytaxtı Kiyevdə keçirilən MDB Parlamentlərarası Assambleyası Şurasının iclasında və Avropada təhlükəsizlik məsələlərinə dair beynəlxalq konfransda iştirak edən Milli Məclisin Regional məsələlər komitəsinin sədri Arif Rəhimzadə bildirib.
MDB və Avropanın bir çox ölkələrindən 100-ə yaxın deputat və ekspertlərin qatıldığı toplantıda Azərbaycanı Arif Rəhimzadədən başqa, Milli Məclisin Hüquq siyasəti və dövlət quruculuğu komitəsinin sədri Əli Hüseynov və parlament sədrinin köməkçisi - MDB PA-da Milli Məclisin daimi nümayəndəsi Aydın Cəfərov da təmsil edib.
Toplantıda MDB parlamentləri arasında əməkdaşlığın möhkəmləndirilməsi, qanun yaradıcılığı sahəsində təcrübə mübadiləsinin aparılması, o cümlədən Avropada təhlükəsizlik və bölkə ölkələrində dondurulmuş münaqişələrin aradan qaldırılması məsələləri müzakirə olunub.
Məqalə müəllifi ilə əlaqə ünvanı: [email protected]
