ABŞ, Vaşinqton, 15 avqust / Trend , müxbir N.Boqdanova /
Dövlət katibinin sabiq köməkçisi Devid Kramer hesab edir ki, Cənubi Qafqazda amerikalı diplomatların əvəzlənməsi ciddi dəyişikliklərə səbəb olmayacaq.
"Çox inamlı və təcrübəli diplomat Tina Kaydanovun təyinatı ilə ciddi dəyişikliklərin baş verəcəyini gözləmirəm", - Trend -a müsahibəsində Dövlət katibinin Avropa və Avrasiya işləri üzrə sabiq köməkçisi, Almaniyanın Marşal Fondunun transatlantik məsələlər üzrə baş elmi əməkdaşı Kramer deyib.
ABŞ regiondakı bir sıra diplomatlarını - ABŞ-ın Azərbaycandakı səfiri, ABŞ-ın ATƏT-in Minsk qrupundakı həmsədri və Dövlət katibinin Avropa və Avrasiya işləri üzrə köməkçisinin müavinini - dəyişir. Həmsədr postunda Metyu Brayzanı ABŞ-ın Kosovodakı səfiri Tina Kaydanov əvəzləyəcək.
"Brayza uzun illər bu məsələləri izləyib və böyük iş görüb. Ancaq yeni perspektivlərə malik olmaq həmişə yaxşıdır və mən Kaydanovun da bu işin öhdəsindən gələcəyinə əminəm", - Kramer bildirib.
ABŞ-ın sabiq rəsmisi inanır ki, ölkənin regiondakı maraqları qalacaq. "Energetika ABŞ üçün regionda əsas prioritet olaraq qalır. ABŞ həm də Dağlıq Qarabağ münaqişəsinin həllini istəyir və Gürcüstana təsir edən problemlər də daxil olmaqla, regiondakı digər problemlərlə işləməyə davam edəcək", - o bildirib.
İki Cənubi Qafqaz ölkəsi arasında münaqişə 1988-ci ildə Еrmənistanın Azərbaycana qarşı ərazi iddiası irəli sürməsi zəminində yaranıb. 1991-ci ilin dekabrında, Şuşa və Xocalı istisna olmaqla, Dağlıq Qarabağ Azərbaycanın nəzarətindən çıxıb. 1992-1993-cü illərdə Şuşa, Xocalı və Dağlıq Qarabağa bitişik yeddi rayon işğal olunub. 1994-cü ilin mayında tərəflər atəşkəs rеjiminə dair razılaşma əldə еdiblər və о vaхtdan bəri, ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
Kramerin sözlərinə görə, əməkdaşlığa dair bütün məsələlərə Obama Administrasiyası tərəfindən böyük diqqət ayrılır. "Bu məsələlər təhlükəsizlik və enerji məsələləri kimi vacibdir", - o qeyd edib.
Məqalə müəllifi ilə əlaqə ünvanı: [email protected]
