Azərbaycan, Bakı, 7 iyul /Trend, müxbir T.Hacıyev/
Azərbaycan ziyalıları namizədliklərinin dəstəklənməsi ilə bağlı müxalifət partiyasına müraciət ediblər. Bu barədə çərşənbə günü Trend-ə müxalif Azərbaycan Milli Demokrat Partiyasının (AMDP) sədri Tufan Kərimli məlumat verib.
"Partiya milli mövqe sərgiləyən, Azərbaycan ictimaiyyətində kifayət qədər tanınmış bir neçə ziyalının namizədliyini seçki prosesində dəstəkləyə bilər. Bu barədə hələ tam razılıq əldə olunmayıb. Ona görə də həmin ziyalıların adını çəkə bilmirəm", - Kərimli əlavə edib.
Azərbaycanda parlament seçkilərinin 2010-cu il noyabr ayının 7-də keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
Partiya sədri Demokratiya Uğrunda İttifaqa (DUİ) daxil olan Azadlıq Partiyası ilə də əməkdaşlıq haqqında danışıqlar aparıldığını bildirib.
"Azadlıq Pariyasının sədri Əhməd Orucla danışığımız olub. Əməkdaşlıqla bağlı ilkin razılıq da əldə olunub. Razılığa əsasən, AMDP və Azadlıq Partiyası dairələrdə namizədliklərini birgə dəstəkləyəcək", - Kərimli əlavə edib.
Partiya sədri bildirib ki, AMDP tərəfdən 62 nəfər parlament seçkilərində namizədliyini irəli sürəcək.