Sosial ədalət prinsipləri tam bərqərar olunmalıdır - Azərbaycan Prezidenti İlham Əliyev (ƏLAVƏ OLUNUB) (FOTO)

Sosial ədalət prinsipləri tam bərqərar olunmalıdır - Azərbaycan Prezidenti İlham Əliyev (ƏLAVƏ OLUNUB) (FOTO)

Dövlət başçısının çıxışı əlavə olunub (ilk xəbər 18:24-də yayılıb)

Azərbaycan Prezidenti İlham Əliyevin sədrliyi ilə martın 9-da Bakı Şəhər İcra Hakimiyyətində şəhərətrafı qəsəbələrin sosial-iqtisadi inkişafına həsr olunmuş müşavirə keçirilmişdi. Həmin müşavirədə dövlətimizin başçısı şəhərətrafı qəsəbələrin sosial-iqtisadi inkişafı ilə bağlı tapşırıqlar vermişdi. Bu tapşırıqların icrası ilə yerində tanış olmaq üçün Prezident İlham Əliyev aprelin 1-də Xətai rayonunun Əhmədli və Nizami rayonunun Keşlə qəsəbələrində olub, məlumatı Prezidentin rəsmi saytı yayıb.

Bakı Şəhər İcra Hakimiyyətinin başçısı Hacıbala Abutalıbov hazırlanmış sxem əsasında Əhmədli qəsəbəsində asfalt örtüyü döşənməsinə ehtiyac olan küçələr barədə dövlətimizin başçısına məlumat verdi. Bildirildi ki, martın 9-da keçirilmiş müşavirədə Azərbaycan Prezidentinin verdiyi tapşırıqların icrasına başlanmışdır. O cümlədən Xətai rayonunun 15 min sakini olan Əhmədli qəsəbəsində 24 min kvadratmetr yola asfalt döşənmişdir. Məhəllədaxili yolların 40 min kvadratmetrlik hissəsi də asfaltlanacaqdır. Qəsəbənin küçələrində müasir işıqlandırma sistemi qurulacaq, kanalizasiya xətləri çəkiləcəkdir. İnfrastrukturun təkmilləşdirilməsi ilə bağlı layihələr şəhərətrafı qəsəbələrin sosial-iqtisadi inkişafı Dövlət Proqramına salınacaqdır. Əhmədli qəsəbəsində müasir xəstəxana və yeni kitabxana binalarının inşası da nəzərdə tutulmuşdur.
Qəsəbədə həyata keçirilən abadlıq və quruculuq işləri ilə yaxından tanış olan Prezident İlham Əliyev sakinlərlə də görüşdü.
Sakinlər dövlətimizin başçısını hərarətlə qarşıladılar.

Prezident İlham Əliyev qəsəbə sakinlərinə müraciətlə dedi:

"Xoş gördük. Əhmədli qəsəbəsində işlər gedir, küçələrə asfalt döşənir. İndi mənə göstərdilər, köhnə küçələrin vəziyyəti çox bərbad idi. Özü də torpaq yollar idi. İndi hər yerə asfalt döşənir. Bu, Bakı qəsəbələrinin sosial-iqtisadi inkişafı proqramının, sadəcə olaraq, həyata keçirilməsində birinci addımlardır. Proqram bütövlükdə hazırlanır və yaxın zamanlarda təsdiq olunacaqdır. Bu proqram bütün qəsəbələri əhatə edəcəkdir. Qəsəbələrdə bütün infrastruktur - su xətləri, kanalizasiya xətləri, qazlaşdırma, - harada ki, hələ lazımi səviyyədə deyil, - elektrik enerjisi ilə təchizat, yolların çəkilişi, məktəblərin, tibb məntəqələrinin təmiri, yaxud da ki, yenidən qurulması məsələləri öz əksini tapacaqdır. Beləliklə, Bakı qəsəbələrində yaşayan insanlar üçün çox yaxşı şərait yaradılacaqdır.
Bu gün isə mən qədim Əhmədli qəsəbəsinə gəlmişəm ki, sizinlə görüşəm" dövlət başçısı deyib.

Sakin söz vermişdiniz.

Prezident İlham Əliyev: "Yadımdadır, söz vermişdim. Amma beş il bundan əvvəl".

Sakin: Yenə də min şükür ki, vaxt tapıb gəlmisiniz.

Prezident İlham Əliyev: "Mən o görüşü xatırlayıram. O, əslində, Bakı qəsəbələrinin inkişafı üçün atılmış birinci addım idi. O vaxt - 2005-ci ildə üçillik proqram qəbul olunmuşdu və icra olundu. Ancaq həyat yerində durmur. Yeni məsələlər ortalığa çıxır və biz artıq bütün imkanları səfərbər edib bütün qəsəbələrdə abadlıq işləri aparmalıyıq. Mən çox şadam ki, gəlmişəm Əhmədlidə sizinlə görüşüm. Baxım, görüm işlər necə gedir. Eyni zamanda, sizdən eşidim ki, əlavə hansı tədbirlər görülməlidir, daha hansı işləri görməliyik".

Sakin: "İcazənizlə, mən deyərdim. İlham müəllim, hörmətli Prezidentimiz, xoş gəlmisiniz, gələn qədəmləriniz var olsun. Allah Sizə yar olsun. Bu gün bayramdır. Sizin bu gəlişiniz bizim bu qəsəbənin tarixinə qızıl hərflərlə yazılacaqdır. Möhtərəm Prezident, bizim qəsəbədə sözün əsl mənasında hökumətə, dövlətə, bizim partiyamıza böyük hörmət var.
Bu da xalqın Sizə olan hörmətinin təzahürüdür. Mən bütün Bakı qəsəbələrində olmuşam, Sizi izləmişəm. İnanın mənə, Bakı qəsəbələrinin əhalisi Sizə necə lazımdır, hörmət və məhəbbət bəsləyir. Mən uzun müddətdir burada yaşayıram, - 83 yaşım var, çoxu inanmır, - böyük işlər görmüşük. Ulu öndərimizin adına bir park salmışıq, nümunəvidir. Bütün kəndin camaatı oraya gedir, rəhmətliyi ziyarət edir, gül qoyuruq, dincəlirik. Bütün bayramlarda gedib-gəlirik.
Əhmədlidə indi abadlıq işləri gedir. Mən şəxsən gözümə inanmıram. Deyirəm ki, mən burada olmuşam?! Hələ rayonu demirəm. Rəhmətlik ulu öndərimizin qarşısında çıxış etmək mənə nəsib olubdur. Bir dəfə mənə dedi ki, hansı rayondansan? Dedim Xətai. Dedi ki, Xətai rayonuna "qara şəhər" deyərdilər, şübhəsiz gələcəkdə "ağ şəhər" olacaqdır. İndi şüar vurulub ki, bizim qəsəbə, daha doğrusu, rayon "ağ şəhər"dir. Ümumiyyətlə, bizim qəsəbə gələcəyin muzeyidir. Əhmədli Bakının qəsəbələri içərisində ən qabaqcıllarındandır. Daha doğrusu, poeziyaya, muğama, təsviri sənətə böyük həvəs göstərən sakinlərimiz var.
Qəsəbədə 15 min sakin yaşayır və uzun müddətdir Sizin gəlişinizi gözləyirdi. Şükür olsun ki, Siz gəldiniz, biz sevinirik. Lakin bir balaca problemlərimiz qalıb. Əvvəlcə deyim ki, arzudan arzu doğulduğu kimi, problemlər də həll olunur. Ancaq yeni problemlər də ortaya çıxır. Bu, təbiidir".

Prezident İlham Əliyev: Elə də olmalıdır.

Sakin: "Nədir bizim problemimiz? Birincisi, insanın sağlamlığı hər şeydən əzizdir. Bizim xəstəxana camaatın tələbinə cavab verə bilmir. Niyə? Çünki möhtərəm Prezident, vaxtilə burada 3 min adam yaşayırdı, indi isə 15 min. Niyə çox yaşayır? Çünki bura mərkəzə yaxındır. Bu, yeganə qəsəbədir ki, yanında metro var.
Möhtərəm Prezident, ulu öndərimiz sözün əsl mənasında fenomen idi. Mən bunun şahidiyəm. Onun qarşısında çıxış edəndə bir şeir dedim. Yazı yazırdı, dedi, şeir kimindir? Dedim, şeir həvəskarınındır. İcazənizlə, həmin şeiri demək istərdim".

Prezident İlham Əliyev: Buyurun.

Sakin: Bir söz deyim, qınamasın el məni,
Uzaqda biz axtarmayaq düşməni.
Millətimiz əgər birlik eyləsə,
Qarşımızda əsir olar erməni.

Prezident İlham Əliyev: Çox sağ olun, çox gözəl şeirdi.

Sakin: Möhtərəm Prezident, bizim küçələrimizin işıqlandırılması vacibdir. Şübhəsiz, bu işləri görəcəklər. Xəstəxana doğrudan da bərbad haldadır. Doğum evi də yoxdur, kitabxanamız da yox dərəcəsindədir. Bir də kanalizasiya məsələsi. Necə deyərlər, ağlamıram, hər şey yaxşıdır. Ümumiyyətlə, bizim 15 minlik camaatımız həmişə Sizə duaçıdır. Mən Sizin gəlişinizi təbrik edirəm. Ürəkdən sevinirəm. Mənim üçün bu, bayramdır. Şübhəsiz, gələcəkdə Allah bir də nəsib edər, Sizinlə görüşərik.

Prezident İlham Əliyev: Çox sağ olun, əlbəttə, görüşəcəyik. Çünki mən Əhmədliyə hələ gələcəyəm. Proqramın icrası ilə maraqlanacağam və qaldırdığınız məsələlər öz həllini tapacaqdır. Kanalizasiya məsələsi bütövlükdə bizim ölkəmizdə çoxdandır ki, həllini gözləyən məsələlərdən biridir.

Sakin: Bilirsiniz niyə görə deyirəm, möhtərəm Prezident? Atalar sözünə uyğunlaşdırsaq, deyə bilərik ki, hər şeyin təzəsi, Əhmədlinin köhnəsi.

Prezident İlham Əliyev: Həm də ki, qədim yaşayış məkanıdır.

Sakin: 400 illik tarixi vardır.

Prezident İlham Əliyev: Qədim kənddir, gözəl adı da var - Əhmədli. Tarixi addır.

Sakin: İndi çoxu soyadını Əhmədli edir. Biz çox şadıq. Mən rayonun Ağsaqqallar Şurasının sədri kimi, eləcə də respublikanın ağsaqqallarından biri kimi Sizə səmimi qəlbdən təşəkkür edir, cansağlığı, uzun ömür arzulayır və oğul toyu nəsib olsun deyirəm.

Prezident İlham Əliyev: Çox sağ olun. Buranın bütün problemləri həll olunacaqdır. Necə ki, yolların asfaltlanmasına başlanıb, küçə işıqlarının quraşdırılmasına başlanacaqdır. Kənd xəstəxanasının vəziyyəti ilə bağlı icra hakimiyyətinin başçısı və Hacıbala Abutalıbov indicə mənə məlumat verdilər, şəkilləri də göstərdilər. Əlbəttə ki, bu, dözülməz bir vəziyyətdir. Belə şəraitdə xəstələri müalicə etmək mümkün deyil. Ona görə mən dərhal göstəriş verəcəyəm, vəsait ayıracağam ki, tezliklə bunun yerində gözəl, müasir xəstəxana tikilsin.
Bilirsiniz ki, indi ölkəmizin hər bir yerində müasir tibb mərkəzləri yaradılır və əlbəttə ki, ilk növbədə Bakıda. Son illərdə Bakıda bir neçə müasir, gözəl xəstəxana tikilmişdir. Hər bir rayonda, hər bir bölgədə xəstəxanalar, tibb məntəqələri tikilir ki, insanların sağlamlığına biz yaxşı xidmət edə bilək. Əlbəttə ki, hər bir kəndin, qəsəbənin öz imkanları olmalıdır. Burada da tibb məntəqəsi olub, lakin əslində, buna xəstəxana demək çətindir, çünki çox balaca, köhnə bir yerdir.

Sakinlər: Çox balacadır, ambulatordur. Əvvəl bura məktəb olub.

Prezident İlham Əliyev: Ona görə yəqin ki, bu sökülməli və yerində yeni xəstəxana tikilməlidir.

Sakin: Yadıma gəlir, bu bina 1936-cı ildə tikilibdir. Üstünü qaldırıb tikmək olar.

Prezident İlham Əliyev: Hər halda, bunu ekspertizadan keçirərlər, baxarlar. Əgər lazım olarsa, yenisini, daha da yaxşısını tikərik.

Sakin: Doğum evi də olsa çox gözəl olar.

Prezident İlham Əliyev: Xəstəxanada mütləq doğum şöbəsi də olmalıdır.

Sakin: Bir də avtobus marşrutu məsələsinin həllini xahiş edirik.

Prezident İlham Əliyev: Bu dar küçələrlə necə gəlib-gedirsiniz?

Sakin: İnanırsınız, palçıqda. İndi o qədər sevinirik ki, yolları asfaltlayırlar.

Prezident İlham Əliyev: Əlbəttə, torpaq yola yağış yağanda palçıq olur.

Sakin: Əhmədli də ən gözəl yerlərdən, məkanlardan biridir.

Prezident İlham Əliyev: Gözəldir, dərhal hiss olunur ki, burada hava da gözəldir. Hamı da yaxşı yaşamalıdır. Mənim arzum bundan ibarətdir ki, hər bir yerdə, hər bir kənddə bütün şərait olsun: işıq, qaz, su, kanalizasiya, yollar, tibb məntəqəsi, məktəb.
Yadımdadır, o vaxt, birinci müşavirədə məsələ qaldırılmışdı ki, bəzi qəsəbələrdə məktəblər lazımi səviyyədə deyil. O məsələlərin böyük əksəriyyətini həll etmişik.

Sakinlər: Bizim kənddə həllini tapıbdır.

Prezident İlham Əliyev: Burada məktəb problemi yoxdur?

Sakinlər: Yox, yoxdur.

Sakin: Birincisi, xoş gəlmisiniz. Biz çox məmnun oluruq ki, Sizi burada yaxından belə görürük. Mən uzun müddətdir ki, Əhmədlidə yaşayıram və eyni zamanda, poliklinikada işləyirəm. Bina keçən əsrdə məktəb kimi tikilib, sonradan poliklinika üçün uyğunlaşdırılmışdır. Burada müasir tələblərə cavab verən tibbi xidmət göstərmək həkimlər üçün çox çətindir. Ona görə, cənab Prezident, Sizdən xahiş edirik ki, bunun yerində müasir tipli xəstəxananın tikilməsində kömək göstərəsiniz.

Prezident İlham Əliyev: Mütləq olacaq.

Sakin: Şəxsən öz adımdan və Əhmədlinin bütün ağbirçəkləri, anaları adından Sizə möhkəm cansağlığı, şərəfli işinizdə uğurlar, ailənizə xoşbəxtlik diləyirik. Allah Sizi qorusun!

Prezident İlham Əliyev: Çox sağ olun. Xəstəxana, stasionar, doğum şöbəsi, müayinə üçün avadanlıqlar, diaqnostika avadanlıqları - hamısı olacaq. Mən çox şadam ki, Siz kitabxana məsələsini qaldırırsınız.

Sakinlər: Çünki lazımdır

.
Prezident İlham Əliyev: Əfsuslar olsun ki, indiki zəmanədə kitabxanalardan o qədər də çox istifadə olunmur. Siz ki, bu məsələni qaldırırsınız, deməli, buna tələbat var.

Sakinlər: Var, oxuyurlar. Kitabxana bərbad vəziyyətdədir. Məşğulluq məsələsinə də baxılsa, çox yaxşı olardı. Biz Sizin çıxışlarınıza qulaq asırıq, izləyirik hamısını. Sizin xarici və daxili siyasətinizi dəstəkləyirik. Ümid edirik ki, bizim kənddə də iş problemi müəyyən dərəcədə həll olunacaqdır.

Prezident İlham Əliyev: Əlbəttə, olunmalıdır. 2004-cü ildən regionların sosial-iqtisadi inkişafı proqramları icra olunur. Eyni zamanda, Bakıətrafı qəsəbələrin də sosial-iqtisadi inkişafı proqramı olmalıdır, o cümlədən qəsəbələrə kreditlər də verilməlidir. Çünki bunlarda yüz minlərlə əhali yaşayır və onların da işlə təmin edilməsi məsələləri həll olunmalıdır. Bu məsələlərlə bağlı iqtisadi İnkişaf Nazirliyinə göstəriş verilibdir. Yaxın vaxtlarda bu məsələyə də baxılacaq, iş adamlarına, sahibkarlıqla məşğul olanlara şərait yaradılacaqdır. Kreditlər verilməlidir. Biz elə etməliyik ki, hər bir vətəndaşın işləmək imkanı olsun. Ona görə də işsizliyə qarşı mübarizə bizim üçün ən başlıca vəzifə idi. Bu gün də belədir. Baxmayaraq ki, işsizliyin böyük hissəsi aradan qaldırılıb, ancaq yenə də işsizlər var. İşləmək istəyən gərək işlə təmin olunsun.
İndi Bakıda və başqa şəhər və rayonlarımızda böyük tikinti işləri gedir. On minlərlə vətəndaş tikintilərdə işləyir, pul qazanır. İndi xaricə gedənlərin sayı da azalır. Əksinə, ölkəyə qayıdırlar, gəlməlidirlər, qayıtmalıdırlar. Yəni qayıtmaq üçün də burada şərait olmalıdır. İş, şərait olmalıdır. Əlbəttə, bunu da biz yaradırıq. Yenə də deyirəm, hər bir kəndin, qəsəbənin problemləri həll edilməlidir. Xüsusilə, Bakının ətrafında və bəzi hallarda Bakının içində yerləşən qəsəbələrin problemləri birinci növbədə həll olunmalıdır.

Sakinlər: İnşallah, Allah qoysa.

Prezident İlham Əliyev: Əlbəttə, mən yenə gələcəyəm. Mən hər bir yerə gedirəm, hər bir qəsəbəyə gedirəm.

Sakinlər: Bizim poliklinikanın açılışına gələrsiniz.

Prezident İlham Əliyev: Gələcəyəm.

Sakinlər: İndidən Sizi açılışa dəvət edirik. Söz verirsiniz. Çox sağ olun.

Sakin: Şəhid anası kimi mən oğlumun adına olan küçənin abadlaşdırılmasına görə Sizə öz minnətdarlığımı bildirirəm.

Sakin: Mənim 7 şagirdim Vətən uğrunda şəhid olub, biri də Seyidxanımın oğludur.

Prezident İlham Əliyev: Allah rəhmət eləsin.

Sakin: Adlarına küçələr var, xatirələri yad olunur. Bizim camaat Vətənə o qədər məhəbbət bəsləyir ki, bu saat desələr, silaha sarılmağa hazır olarlar. Özü də ki, Siz deyəsiniz.

Sonda qəsəbə sakinləri dövlətimizin başçısı ilə xatirə şəkli çəkdirdilər.

Əhmədli kəndinin sakinləri ilə görüşdən sonra Prezident İlham Əliyev Nizami rayonunun Keşlə qəsəbəsinə gəldi. Keşlə qəsəbəsinin sxemi əsasında da asfalt örtüyünün döşənməsinə ehtiyac olan küçələr barədə dövlətimizin başçısına məlumat verildi.
Keşlə qəsəbəsində də abadlıq və quruculuq tədbirlərinə yolların əsaslı təmiri ilə başlanılıb. Yararsız vəziyyətdə olan qəsəbədaxili yolların 18 min 200 kvadratmetrlik hissəsinə artıq asfalt döşənib. Yolların qalan 55 min kvadratmetrlik hissəsinə isə yeni asfalt örtüyünün döşənəcəyi qeyd olundu. Keşlə qəsəbəsində də küçələrin işıqlandırılmasına, su və kanalizasiya sisteminin yenidən çəkilməsinə başlanılacaqdır. Dövlətimizin başçısının tapşırığı ilə qəsəbənin "Qafqaz" yaşayış massivində 600 şagird yerlik yeni məktəb binası inşa olunacaqdır. Qəsəbədə müasir xəstəxana binasının və təcili yardım stansiyasının tikiləcəyi də nəzərdə tutulur.
Görülən işlərlə yaxından tanış olan Prezident İlham Əliyev Keşlə qəsəbəsinin sakinləri ilə görüşdü.
Keşlə qəsəbəsinin sakinləri dövlətimizin başçısını hərarətlə qarşıladılar.

Prezident İlham Əliyev qəsəbə sakinlərini salamlayaraq dedi:

"Keşlə qəsəbəsinin inkişafı ilə bağlı müvafiq tapşırıqlar verilmişdir və o tapşırıqlar yerinə yetiriləcəkdir. Beləliklə, bu qəsəbədə olan bütün problemlər tədricən öz həllini tapacaqdır. Keşlə qəsəbəsinin ərazisi və əhalisi Nizami rayonunun təqribən yarısı qədərdir. Qədim yaşayış məntəqəsidir. Elə etməliyik ki, burada yaşamaq üçün bütün şərait yaradılsın. Sosial-iqtisadi inkişaf baxımından müəyyən işlər görülmüşdür. Yeni iş yerləri, yeni sənaye müəssisələri açılmışdır. Ancaq hələ görüləsi işlər çoxdur. İlk növbədə infrastruktur, su, kanalizasiya xətləri, qazlaşdırma prosesi daha da sürətlə getməlidir. İndi bu işlərin böyük əksəriyyəti görülüb. Amma bəzi hallarda qazın təzyiqi aşağı səviyyədədir. Yolların çəkilişi və yeni asfalt örtüyün vurulması məsələləri vardır. İndi mənə məlumat verilib ki, xəstəxananın tikintisinə ehtiyac vardır. Əlavə məktəb tikilməlidir. Yəni, bütün bu məsələlər Bakıətrafı qəsəbələrin sosial-iqtisadi inkişafı proqramında öz əksini tapacaqdır. Proqram yaxın zamanlarda təsdiq olunacaqdır.
Amma biz vaxt itirməmək üçün artıq işlərə başlamışıq. Yollar çəkilir və lazım olan digər məsələlər öz həllini tapmalıdır. Hər bir yaşayış məntəqəsində, Bakının hər bir qəsəbəsində normal, yaxşı şərait yaradılmalıdır. Mən isə gəlmişəm ki, bu gün sizlə görüşüm, sizdən eşidim hansı işlər görülməlidir, əhalini narahat edən məsələlər nədir, nəyi biz əlavə etməliyik?! Çünki mən sizdən eşitmək istəyirəm. Qəsəbə sakinlərini nələr, hansı məsələlər narahat edir ki, biz onları operativ şəkildə həll edək".

Sakin: Əsas məsələ evlərin özəlləşdirilməsi idi ki, bu barədə Sərəncam vermisiniz.

Prezident İlham Əliyev: Qeydiyyatla bağlı?

Sakin: Bəli, qeydiyyatla bağlı. Biz bu Sərəncamı gözləyirdik. Çox sağ olun, Sizə təşəkkür edirik. Sizə minnətdarıq ki, belə bir Sərəncamı verdiniz. Çox böyük problem idi.

Prezident İlham Əliyev: Uzun illərdir ki, gündəlikdə duran problemdir. Uzun illər idi ki, həll olunmurdu. Ancaq biz bunu həll eləməliyik.

Sakin: Çox sağ olun.

Prezident İlham Əliyev: Amma elə həll eləməliyik ki, bu məsələdə xoşagəlməz halları aradan götürək. Ona görə göstəriş verilib, indi xüsusi bir mexanizm hazırlanır ki, biz bunu necə tezliklə və şəffaf şəkildə edək. Həm də evin sənədini almaq istəyənə qarşı qanunsuz tələblər irəli sürülməsin. Şəffaf, rüşvətsiz.

Sakin: Keşlədə abadlaşma işləri doğrudan da xoş əhval-ruhiyyə yaradır. Əsas da bu Sərəncamı verəndən sonra. Mənim artıq yaşımın demək olar ki, yarısı getmişdi. Mən heç bu Sərəncamı gözləmirdim də. Odur ki, çox sağ olun, çox təşəkkür edirəm. Mən Sizə cansağlığı arzulayıram.

Prezident İlham Əliyev: Sağ olun. Biz bunu tezliklə edəcəyik ki, insanlar da necə deyərlər, öz hüquqlarından tam şəkildə istifadə etsinlər. Sənədləşmə, sonra qeydiyyatın olmaması ilə bağlı digər problemlər də meydana çıxır və biz bu məsələni birdəfəlik həll etməliyik.
Keşlədə və bütün qəsəbələrdə abadlıq işləri gedir. Parklar, küçələr abadlaşır, küçə işıqları quraşdırılır. Rayonda işlər yaxşı gedir, daha da sürətli gedir. İndi Bakı dünya miqyasında ən gözəl şəhərlərdən biridir. Bakı qəsəbələri də gözəl olmalıdır. Burada yaşamaq, işləmək üçün bütün şərait olmalıdır.

Sakin: Sizin sayənizdə! Cənab Prezident, mən Sizi Keşlə ziyalıları, sakinləri adından salamlayıram, Sizə "Xoş gəlmisiniz" deyirəm. Həmişə Siz gələsiniz. On il bundan əvvəl bu şəraiti görmək olmazdı. İndi Keşlədə asfaltsız küçə yoxdur. Bu, Sizin qayğınız, dövlətin qayğısının nəticəsidir. Ona görə də biz Sizə minnətdarıq. Ailənin başında duran adam yerində olursa, o ailə möhkəm və sağlam olur. Dövlətin də başında duran Prezidenti əgər yerindədirsə, o dövlət inkişaf edəcək, çiçəklənəcəkdir. Ona görə biz Sizə minnətdarıq. İndi nəinki Keşlə qəsəbəsi, bütün Azərbaycan böyük tikinti meydançasını xatırladır. Bu, bizim fəxrimizdir. Təkcə tikinti deyil, iqtisadiyyatımız da inkişaf edir. Biz Sizin siyasətinizi dəstəkləyirik və həmişə dəstəkləmişik. Biz Sizin strategiyanızı müdafiə edirik, Sizə təşəkkürümüzü bildiririk. İndi bizim bədxahlarımız, qonşularımız və yaxud da içimizdə olan bəziləri bu inkişafımıza xor baxmaq, ona kölgə salmaq istəyir. Amma bunlar onların xam xəyalıdır.
Azərbaycan iri addımlarla irəliləyir. Azərbaycan yüksəlir, inkişaf edir. Azərbaycanda əmin-amanlıqdır, sabitlikdir. Buna görə də Azərbaycanı o inkişaf kursundan heç bir qüvvə döndərə bilməz. Mən müəlliməm, təhsil işçisiyəm və valideynlərlə həmişə təmasdayam, onların fikirləri bizə aydındır. Ona görə əmin olun ki, biz Sizi həmişə dəstəkləmişik, dəstəkləyirik. Biz Sizin ətrafınızda yumruq kimi birləşmişik. Siz Heydər Əliyevin siyasətini çox gözəl davam etdirirsiniz, ona görə biz arxayınıq. Arxayınıq ki, dövlətimizin başçısı dünya miqyasında nüfuz sahibidir. Necə deyərlər, imzalar içində imzamız, dövlətlər içində səsimiz vardır. Ona görə də Azərbaycan inkişaf etməkdə olan dövlətlər sırasındadır. Ona görə də, cənab Prezident, mən Sizə minnətdaram. İnsan elə bir xilqətdir ki, azca bir diqqət onu ruhlandırır. Sizin kiçikdən böyüyə, ən ucqar rayondan mərkəzə qədər göstərdiyiniz qayğı hamının ürəyincədir. Bizə bu diqqətinizə görə Sizə sağ olun deyirəm.

Prezident İlham Əliyev: Sağ olun.

Sakin: Sizə bu qayğınıza görə sağ olun deyirik. Sizin təkcə təhsilə göstərdiyiniz qayğı kifayətdir. İndi biz neftə arxalanmamalıyıq. Sizin insan kapitalını inkişaf etdirmək istiqamətində gördüyünüz işlər, yeni texnologiyadan istifadə etməyimiz barədə verdiyiniz sərəncamlar çoxdur. Hazırda Keşlədə üç məktəb vardır. Hər üçünün də çox gözəl şəraiti vardır və yenə də təmin olunurlar. Uşaqlarımıza mərkəzdə olan uşaqlar kimi yaxşı şərait yaradılıb. İnanın ki, gələnlər deyir ki, doğrudanmı burada belə gözəl məktəb vardır? Bu da Sizin sayənizdədir, dövlətin qayğısının sayəsindədir. Ona görə biz Sizin fəaliyyətinizi alqışlayırıq. Sizə uzun ömür, cansağlığı arzulayırıq. Arzu edirik ki, ömrünüz uzun, canınız sağlam olsun ki, Azərbaycanı daha da irəliyə aparasınız. Minnətdarıq Sizə.

Prezident İlham Əliyev: Çox sağ olun, xoş sözlərinizə görə minnətdaram. Bu mənim işimdir, mənim borcumdur. Mənim işim ondan ibarətdir ki, xalqa xidmət etməliyəm. Onu da edirəm və bundan sonra da edəcəyəm. Bütün işlərimdə mən xalqa arxalanıram. Yəni, əgər təşəbbüslərimiz xalq tərəfindən dəstəklənməsəydi, bütün bu işləri görmək mümkün olmazdı. Ona görə Bakıda, ətraf qəsəbələrdə, hər bir rayonda, Azərbaycanın ən ucqar yerində inkişaf, abadlıq, quruculuq vardır. Məktəb tikintisi, xəstəxanaların tikintisi - nədir bu? Siz tamamilə haqlısınız, bu, gələcəyə atılmış addımlardır. Gənclərimiz bilikli, savadlı, vətənpərvər, sağlam olmalıdırlar. Hər bir yerdə idman kompleksi qurulur, idman meydançaları, məktəblər, xəstəxanalar, diaqnostika mərkəzləri tikilir. Hər dəfə diaqnostika mərkəzlərinin, xəstəxanaların açılışında mən insanlara müraciət edirəm, deyirəm ki, gərək hər bir vətəndaş ildə bir dəfə müayinədən keçsin. Əgər hər hansı bir xəstəlik varsa, o, müəyyən olunmalıdır. İndi imkanlar da vardır, həkimlərimiz də peşəkardır. İndi bütün imkanlar var ki, biz insanların sağlamlığına yaxşı səviyyədə qulluq edək.
Abadlıq, quruculuq işləri gedir. Yəni, biz hamımız istəyirik ki, ölkəmiz daha da inkişaf etsin, çiçəklənsin, güclənsin və bunu etmək üçün bütün imkanlar vardır. İlk növbədə xalqla iqtidar arasında birlik vardır. Bu birliyi heç kim sarsıda bilməz, heç kim buna zərbə vura bilməz. Bizim təşəbbüslərimiz Azərbaycanın gələcəyinə yönəlib. Azərbaycanın uğurlu iqtisadi inkişafı, siyasi sabitliyi böyük dəyərimizdir.
Biz 1990-cı illərin əvvəllərini yaxşı xatırlayırıq. O illərdə xaos, anarxiya, özbaşınalıq, silahlı quldur dəstələri meydan oxuyurdu. Ölkəmiz məhv olurdu, parçalanırdı, dağıdılırdı. Ancaq bu gün sabitlik, inkişaf vardır, insanlar təhlükəsizlik şəraitində yaşayırlar. Bakı dünya miqyasında ən təhlükəsiz şəhərlərdən biridir. Gecə-gündüz insanlar rahat yaşayırlar, uşaqlar rahat gəzir, yaşlılara hörmət vardır. Biz milli ənənələrimizi qoruyuruq. Bu da çox böyük dəyərdir. Bəzi hallarda biz, yəni, bu işlərə, bu məsələlərə indi öyrəşmişik, hesab edirik ki, hər yerdə belədir. Hər yerdə belə deyildir. Azərbaycan xalqının milli mənəvi dəyərləri çox yüksək səviyyədədir. Biz onları qorumalıyıq. Gənc nəsil də milli ruhda tərbiyə olunmalıdır ki, Azərbaycanın uğurlu, hərtərəfli inkişafı dayanıqlı və daimi olsun.

Sakin: Biz də Sizin qayğınızı doğrultmağa çalışacağıq.

Prezident İlham Əliyev: Mənin də işim ondan ibarətdir ki, Azərbaycan xalqına xidmət edim. Bu işi yaxşı görmək üçün gərək mən bilim ki, hansı məsələlər var, onlar da həll olunmalıdır. Əlbəttə, mənə ölkədə gedən proseslərlə bağlı gündəlik arayışlar, məlumatlar verilir. Ancaq mən hər şeyi öz gözümlə görməliyəm və məhz sizdən eşitməliyəm.
Bax bu gün gəlmişəm bura. Artıq mənə deyilir ki, xəstəxananın, əlavə məktəbin tikintisinə ehtiyac vardır. Küçə işıqları bəzi hallarda yoxdur, asfaltlaşma getməlidir, ondan sonra kanalizasiya, su xətləri çəkilməlidir. Biz isə bunları görəcəyik. Yəni, bunları, bu işləri görmək üçün bütün imkanlar vardır.

Sakin: Vaxt lazımdır.

Prezident İlham Əliyev: Vaxt, iradə və Vətənə sevgi olmalıdır. Hər bir dövlət məmuru xalqa xidmət etməlidir. Hər bir icra başçısını vəzifəyə təyin edərkən, qəbul edərkən göstəriş verirəm ki, get, xalqa xidmət elə, bu yüksək məsuliyyəti, bu etimadı doğrult. Mənim birinci tələbim xalqa xidmət etməkdir, problemləri həll etmək, şərait yaratmaq, insanları incitməmək, əsassız tələblər irəli sürməməkdir. Yəni, belə olmalıdır, ədalət olmalıdır. Birinci növbədə sosial ədalət. İndi Azərbaycanda elələri vardır ki, yaxşı yaşayır, elələri vardır ki, orta səviyyədə, elələri də vardır ki, pis yaşayır. Onlar da vardır. Onlar olmamalıdır, biz onların səviyyəsini qaldırmalıyıq. İndi 500 mindən artıq vətəndaş ünvanlı sosial yardım alır. Bu, nə deməkdir? O deməkdir ki, onun normal yaşamağa imkanı yoxdur. Dövlət kömək etməlidir. Ünvanlı sosial yardımı alanlar - hər ailə - haradasa 100 manat səviyyəsində müavinət alır. Yəni dövlət öz tərəfindən kömək göstərir. Amma elə etməliyik ki, şərait olsun, hər bir vətəndaş işlə təmin edilsin, yaxşı maaş alsın və yaxşı da yaşasın. Bizim istəyimiz bundan ibarətdir.

Əgər hər bir qəsəbənin məsələləri həll olunarsa, onda ölkədə problem qalmaz. Biz iqtisadi və sosial problemləri mütləq həll edəcəyik. Sosial ədalətlə bağlı məsələlərdə hər bir dövlət məmuru vicdanlı olmalıdır, yenə də deyirəm, insanlara qulluq etməlidir. Dövlət məmurunun vəzifəsi ondan ibarətdir. Xalq da nəzarət etməlidir. Mən dəfələrlə müraciət etmişəm, bir də müraciət etmək istəyirəm. Harada ki, işlər yaxşı getmir, qüsurlar, çatışmayan cəhətlər vardır, məlumat verin, məktub göndərin. İndi elektron poçt vardır. Məktubla müraciət edin. Biz bilməliyik.

İndi korrupsiyaya qarşı qurumda "qaynar xətt" yaradılıbdır. Zənglər, müraciətlər gəlir. Onlara operativ şəkildə münasibət bildirilir, məsələlər araşdırılır, cəza tədbirləri görülür. Biz bütün xoşagəlməz halları Azərbaycanda aradan götürməliyik. Sosial ədalət prinsipləri tam bərqərar olunmalıdır. İnsanların yaşaması, işləməsi üçün bütün şərait olmalıdır və biz bunu etmək üçün çalışırıq.

Mən Keşlə qəsəbəsinin də gələcək inkişafını çox gözəl görürəm. Burada, bütövlükdə rayonda işlər yaxşı gedir. Siz özünüz də qeyd etdiniz. Qısa müddət ərzində. Daha da sürətlə getməlidir.

Sakin: Bütün bunların hamısı göz qabağındadır. Bunları görməmək qeyri-mümkündür. Bunlar hamısı Sizin sayənizdə baş vermişdir. Mən yaşlı nəslin nümayəndəsi, bir ağsaqqal kimi nəyi demək istəyirdim. Siz elə bir insanın övladı, elə bir insanın varisisiniz ki, bütün bu işləri Sizdən başqa heç bir kəs görə bilməz.

Sonda sakinlər Prezident İlham Əliyevlə xatirə şəkli çəkdirdilər.

Foto - Azərbaycan Prezidentinin rəsmi saytı

İstədim ona deyim ki, mən də səni, qaqa. Amma gözlərim artıq bağlandı... Şəhidlərinin xatirəsinə həsr olunmuş "Olmayan Bir Müsahibə ..."
İstədim ona deyim ki, mən də səni, qaqa. Amma gözlərim artıq bağlandı... Şəhidlərinin xatirəsinə həsr olunmuş "Olmayan Bir Müsahibə ..."
Şagirdlərin yarım illik nəticələri belə qiymətləndiriləcək - Qaydalar təsdiqləndi
Şagirdlərin yarım illik nəticələri belə qiymətləndiriləcək - Qaydalar təsdiqləndi
Mingəçevir Dövlət Universitetində 20 Yanvar faciəsinin otuz birinci ildönümünə həsr olunmuş seminar keçirilib
Mingəçevir Dövlət Universitetində 20 Yanvar faciəsinin otuz birinci ildönümünə həsr olunmuş seminar keçirilib
Loading Bars
Xəbər lenti
İstədim ona deyim ki, mən də səni, qaqa. Amma gözlərim artıq bağlandı... Şəhidlərinin xatirəsinə həsr olunmuş "Olmayan Bir Müsahibə ..."
Lənkəranda üçmərtəbəli binada yanğın olub
Şagirdlərin yarım illik nəticələri belə qiymətləndiriləcək - Qaydalar təsdiqləndi
Sorosun oyuncağı Paşinyan Ermənistanı bataqlıqdan çıxara bilmir - İqtisadiyyat çökür, etirazlar isə bitmir
2020-ci ildə qlobal sərnişin daşımaları kəskin azalıb
Prezident İlham Əliyevin rəsmi "Facebook" səhifəsində 20 Yanvar faciəsinin ildönümü ilə bağlı paylaşım edilib (FOTO)
Türkiyədə son sutkada koronavirusdan 7 218 nəfər sağalıb
Mingəçevir Dövlət Universitetində 20 Yanvar faciəsinin otuz birinci ildönümünə həsr olunmuş seminar keçirilib
Sumqayıtda fərdi evdə yanğın baş verib
Nazirlik Azərbaycanda internet rabitəsinin genişləndirilməsi işləri barədə
Ermənistanın yalanları dünyanı 20 Yanvar faciəsinin əsl mahiyyətindən yayındırmağa yönəlib - Politoloq
Qarabağda Rusiya və Azərbaycan xilasedicilərinin birgə fəaliyyəti ilə 210 ədəd mina zərərsizləşdirilib (FOTO)
Beynəlxalq Bankın xalis mənfəəti dəfələrlə azalıb
Dübəndi terminalında neft nəqli kəskin şəkildə artıb
Bu rayonlara qar yağıb - FAKTİKİ HAVA
Pambıqçılığın inkişafı ilə bağlı ötən ilin yekunları və qarşıda duran vəzifələrlə bağlı müşavirə keçirilib (FOTO)
İşğaldan azad edilmiş torpaqların inkişaf modeli nümunəvi xarakter daşıyacaq - Könül Nurullayeva
BNA-da Vətən müharibəsinin iştirakçısı olan əməkdaşlarla görüş keçirilib
Bakıda yol qəzası tıxaca səbəb olub
“YAŞAT" Fondu tərəfindən daha 3 nəfərin əməliyyatı təmin edilib (FOTO)
İran Qarabağın bərpasında aktiv iştirak etmək niyyətindədir - Nümayəndələr Azərbaycana səfər edəcək
Sovet rəhbərliyi 20 yanvar faciəsini törətməklə Azərbaycan xalqının qürurunu sındırmaq istəyirdi - Arzu Nağıyev (VİDEO)
QMİ sədrinin Dağlıq Qarabağla bağlı müraciətinə Vatikan cavab verib
Cəbrayıl-Füzuli istiqamətində gedən döyüşlərdə şəhid olan DİN çavuşu (FOTO)
Kəlbəcər rayonunun Çopurlu kəndi (FOTO/VİDEO)
20 Yanvar hadisələri ilə əlaqədar əlilliyi olanlar sosial müdafiə tədbirləri ilə əhatə olunublar
YAP Zəngilan rayon təşkilatında 20 Yanvar şəhidlərinin xatirəsi yad edilib
ADU-da 20 Yanvar faciəsinin ildönümünə həsr olunmuş seminar keçirilib
Azərbaycana gələn Türkiyə vətəndaşları üçün etibarlı sərhədkeçmə sənədlərinin siyahısı müəyyənləşib
İşğaldan azad olunan əraziləri minalardan təmizləmək üçün Rusiyadan yeni avadanlıqlar gətirildi (FOTO/VİDEO)
Yanvarın 21-nə USD/AZN rəsmi məzənnəsi
Ermənistan vətəndaşları Qarabağdakı zənginlər uğrunda ölməməlidir - Erməni jurnalist
Türkdilli dövlətlər arasında əməkdaşıq perspektivləri müzakirə edilib
Özəlləşdirmə və icarədən dövlət büdcəsinə 71,8 milyon manat daxil olub
Xaçmazda Şəhidlər Xiyabanı yenidən qurulub (FOTO)
Kanada mediasında 20 Yanvar faciəsinə həsr olunmuş məqalə dərc olunub
Azərbaycan - Türkiyə media platforması birgə əməkdaşlığa yeni çalarlar qatacaq - Naqif Həmzəyev
Sabirabadda “Mercedes” yanıb
Aida Mahmudovanın ABŞ-da açılmış sərgisi beynəlxalq media tərəfindən geniş işıqlandırılıb (FOTO)
Azərbaycan, Əfqanıstan və Türkmənistan arasında Yol Xəritəsi imzalanıb
Ötən ilin ən çox istifadə olunan hava limanı məlum oldu
İşğaldan azad edilmiş ərazilərdə nar bağları salınacaq
15 mikrondan çox olan polietilen torbaların pulla satılması təklif edilir
Səhiyyə Nazirliyinin əməkdaşları peyvənd olundu
YAP 2020-ci ilə dair gəlir və xərclərini açıqlayıb
Koronavirusla bağlı nəqliyyat vasitələrində yol verilən nöqsanlar açıqlanıb
Təlim hərbi hissələrində gənc əsgərlərin qəbulu davam edir (FOTO/VİDEO)
Bağdad Amreyev: Azərbaycan torpaqlarının azad edilməsi bütün türk dünyasının böyük zəfəridir
Nurlan İbrahimov Qarabağ klubundakı vəzifəsindən ayrıldı
2022-ci ildə Şuşanın türk dünyasının mədəni paytaxtı elan olunmasını təklif edirik - Bağdad Amreyev
YAP 2020-ci ildəki fəaliyyəti ilə bağlı hesabat verdi
Xəzərə tullantı sularının axıdılması halları xeyli azalıb - Nazirlik rəsmisi
Azərbaycanda köhnə avtomobillərin utilizasiyası proqramı hazırlanıb
Prezident İlham Əliyev: Bu çətin vaxtda mənəvi-siyasi dəstək bizim xalqımız üçün olduqca vacibdir
Tullantıların idarəolunması üçün 8 regional poliqon yaradılacaq - Nazirlik
Azərbaycanın avtomobil parkı kifayət qədər köhnədir - Ekspert
Prezident İlham Əliyev: Şuşa hələ çox beynəlxalq tədbirlər görəcək
Azərbaycan Prezidenti: Zənnimcə, lap yaxın vaxtlarda biz hamımız dirçəldilmiş şəhərləri görəcəyik
Azərbaycan Prezidenti: Türk Şurası müharibə dövründə bizi hamıdan çox dəstəkləyən təşkilatdır
BNA sürücü və sərnişinlərə xəbərdarlıq etdi
“Gömrük orqanlarında xidmət haqqında Əsasnamə”də dəyişiklik edilib
Prezident İlham Əliyev: Gələcək nəsillər yadda saxlasınlar ki, yalnız öz gücümüzə güvənməliyik
Prezident İlham Əliyev: XX əsrdə belə barbarlıq, şəhərlərin və kəndlərin qəsdən məhv edilməsi görünməyib
Prezident İlham Əliyev: Xarici jurnalistlər Ağdamı “Qafqazın Xirosiması” adlandırıblar
MM Komitəsi azad edilmiş ərazilərdə aqrar sahənin inkişafını qiymətləndirəcək
Dövlət qulluğu üzrə müsabiqənin test imtahanında iştirak etmək üçün qeydiyyat elan edilib
Şəhid ailələrinə və əlillərə birdəfəlik yardım göstərilib
Ombudsman 20 Yanvar faciəsinin 31-ci ildönümü ilə əlaqədar bəyanat yayıb
İstedadlı şagirdlər eksternat qaydasında imtahan verib
20 Yanvar hadisələri ilə əlaqədar əlilliyi olanların ictimai birliklərinin rəhbərləri ilə işçi görüş olub (FOTO)
“Azərsu” vətəndaşlara müraciət edib (FOTO)
Azərbaycanda 949 nəfər COVID-19-dan sağalıb, 305 nəfər yoluxub, 10 nəfər vəfat edib
Bakı Beynəlxalq Dəniz Ticarət Limanında yükaşırmanın həcmi artıb
MİDA və YAP Nəsimi Rayon Təşkilatının 20 Yanvar faciəsinin 31-ci ildönümünə həsr olunmuş birgə sosial aksiyası keçirilib (FOTO)
Azərbaycan koronavirusa qalib gələn ilk ölkələr sırasında olacaq - Deputat
İğdır şəhərində 20 Yanvar şəhidləri anılıb (FOTO)
Azərbaycanda iqtisadi artımın yüksək trayektoriyaya keçmək imkanları var - Vüsal Qasımlı
Beynəlxalq Multikulturalizm jurnalı Ali Attestasiya Şurasında qeydiyyata alınıb
Bakı Ali Neft Məktəbində “Qarabağın Təbii Sərvətləri” mövzusunda vebinar keçiriləcək
“Akkord STİK” ASC və “Qazax Sement Zavodu” MMC “Qarabağ Dirçəliş Fondu”na 400 min manat ianə köçürüb
Torpaq sahələrində aqrokimyəvi analizlərin həyata keçirilməsində yeniliklər olacaq
Ötən il özəlləşdirmə və icarədən büdcəyə 72 milyon manat daxil olub
İranda bir gündə 6 minə yaxın şəxs koronavirusa yoluxub, 87 nəfər ölüb
Bakı Slavyan Universitetində 20 Yanvar şəhidlərinin xatirəsi yad edilib (FOTO)
Dövlət Vergi Xidməti əməkdaşlarının məqaləsi beynəlxalq nəşriyyatda çap olunub
Aİİ-də 20 Yanvar Ümumxalq Hüzn Gününə həsr olunmuş tədbir keçirilib (FOTO)
“Zəfər yolu” sentyabr ayınadək asfaltlanaraq istifadəyə veriləcək (FOTO)
Şəhidlər Xiyabanına vətəndaşların ziyarəti əvvəlki illərdən fərqli təşkil ediləcək - DİN
Hirkan Milli Parkındakı yanğın nəticəsində dəyən zərər hesablanır - Xidmət rəisi
Ombudsman 20 Yanvar abidə kompleksini ziyarət edib (FOTO)
Məktəblərin açılması xəbərlərinə Təhsil nazirliyindən cavab
Ötən il Mətbuat Şurasına göndərilən şikayətlərin sayı açıqlanıb
Azad edilmiş ərazilərdə Prezidentin xüsusi nümayəndəlikləri təsis edilir - Fərman
Prezident İlham Əliyev Türkdilli Dövlətlərin Əməkdaşlıq Şurasının Baş katibini videoformatda qəbul edib (FOTO/VİDEO) (YENİLƏNİB)
Aİ ölkələrində yeni avtomobil satışı rekord həddə azalıb
Ermənilərin meşə fonduna, təbii sərvətlərə vurduğu ziyan hesablanır - Nazir müavini (FOTO/VİDEO)
Azərbaycanda yeni qızıl-mis yatağı kəşf edilib (ƏLAVƏ OLUNUB)
Türkiyə Azərbaycanla Preferensial ticarət sazişini ratifikasiya edib
Yol polisi hava şəraiti ilə bağlı sürücülərə xəbərdarlıq etdi
Azərbaycan əhalisi benzinə və dizelə 2 milyard manatdan artıq vəsait xərcləyib
Bütün xəbərlər