Yanvarın 9-da Azərbaycanın Ağır Cinayətlərə Dair İşlər üzrə Hərbi Məhkəməsində 1997-2002-ci illər ərzində "İqor" şərti adı altında Rusiya kəşfiyyatına casusluq edən Azərbaycan zabiti Pyotr Vladimiroviç Mocalov 12 illik həbs cəzasına məhkum edilib. Bu barədə Trend ə Hərbi Məhkəmədən məlumat verilib.
Qapalı keçən məhkəmə iclasında müəyyən edilib ki, Pyotr Mocalov 1992-ci il ildən Azərbaycanın Müdafiə Nazirliyinin Təşkilat Səfərbərlik İdarəsinin təşkilat-ştat strukturu bölməsinin zabiti kimi işə qəbul olunub. Naxçıvan Muxtar Respublikasındakı N saylı hərbi hissənin qərargah rəisinin köməkçisi vəzifəsində çalışıb. 1998-ci ildə ordu sıralarından kapitan rütbəsi ilə ehtiyata buraxılıb.
Məhkəmə onu da müəyyən edib ki, Mocalov casusluğa hələ ehtiyata buraxılmamışdan 1 il əvvəl - 1997-ci ildə başlayıb. Həmin il o, Rusiyanın Azərbaycandakı səfirliyində diplomat kimi çalışan Rusiyanın Müdafiə Nazirliyinin Ali Qərargah Baş İdarəsinin əməkdaşı Lastovski Valeri Alekseyeviçlə tanış olub və "İqor" şərti adı altında Rusiya kəşfiyyatçılarına Azərbaycanın dövlət əhəmiyyətli hərbi sirlərini ötürməyə başlayıb. P.Mocalov hər məlumata görə kəşfiyyatçılardan 300-400 ABŞ dolları alırmış.
Bu məxfi əməkdaşlıq 2006-cı ilin oktyabr ayında ifşa edilib və Mocalov həbs olunub.
