"Mən "Azadlıq" bloku Sədrlər Şurasının bu gün keçirilən iclasında iştirak etdim Sədrlər Şurasının üzvləri buna heç bir etiraz bildirmədilər. Çünki onlar məni ADP-nin blokdakı nümayəndəsi kimi qəbul edirlər." Bu sözləri Trend ə açıqlamasında müxalifətyönlü Azərbaycan Demokrat Partiyasının (ADP) Ali Məclisinin sədri Akif Şahbazov deyib.
Xatırladaq ki, "Azadlıq"ın təsisçilərindən biri olan ADP-ni blokun Sədrlər Şurasının iclaslarında indiyə qədər partiya sədrinin birinci müavini Sərdar Cəlaloğlu təmsil edib. ADP sədri Rəsul Quliyev fevralın 10-da imzaladığı sərəncamla Sərdar Cəlaloğlunu müavin vəzifəsindən azad edib və Ali Məclisin sədri Akif Şahbazovu ADP-nin "Azadlıq" blokundakı nümayəndəsi təyin edib. Lakin ADP rəhbərliyi və Sərdar Cəlaloğlu bu qərarı tanımır.
A.Şahbazov qeyd edib ki, iclasda ölkədəki ictimai-siyasi vəziyyət, ADP-də yaranmış durum müzakirə olunub. Sədrlər Şurasının üzvləri ADP-nin iki qeyri-bərabər hissəyə parçalanmasıdan narahatılq ifadə ediblər.
Qeyd edək ki, ADP Mərkəzi Aparatının fevralın 12-də keçirilən iclasında Akif Şahbazovun partiyadan xaric olunması haqqında qərar qəbul olunub.
A.Şahbazov bildirib ki, "Azadlıq" bloku Sədrlər Şurasının iclasında bu məsələ müzakirə olunmayıb.
Xatırladaq ki, iclas bu saatlarda A.Şahbazovun iştirakı olmadan davam edirilir. ADP təmsilçisi deyib ki, Sədrlər Şurasının üzvləri ADP-dəki vəziyyətlə bağlı mövqelərini dəqiqləşdirmək üçün müzakirələri davam etdirirlər.
