Azərbaycan, Bakı, 07 aprel / Trend müx. K.Ramazanova/ Avropa Parlamenti Azərbaycanda insan haqlarının və KİV-in söz azadlığının təmin edilməsi ilə bağlı vəziyyətin pisləşməsindən narahat olduğunu ifadə edib. Bu barədə bazar ertəsi Avropa Parlamentinin İnsan haqları və Xarici əlaqələr üzrə Komitəsinin üzvü Katrina Saks bildirib.
"Biz bu regionda KİV nümayəndələrinin insan haqlarının, müstəqilliyinin və söz azadlığının təmin olunması vəziyyətindən narahatıq" - deyə Saks bildirib.
Azərbaycanda üç jurnalst - "Azadlıq" qəzetinin baş redaktoru Qənimət Zahid, onun qardaşı, qəzetin əməkdaşı Mirzə Sakit və "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayev həbsdədir.
12 saylı Cəzaçəkmə Müəssisəsində saxlanan "Gündəlik Azərbaycan" və "Realnıy Azerbaydjan" qəzetlərinin baş redaktoru Fətullayev martın 26-dan aclığa başlayıb. Baş redaktor işinə ədalətli və qərəzsiz baxılmasını, həbsdə olan həmkarlarının azadlığa buraxılmasını, Avropa Şurası və ATƏT-in siyasi məhbus məsələsində konkret müdafiə mexanizmləri ortaya qoymasını tələb edir .
Aksiyaya dəstək məqsədi ilə jurnalistlər, siyasi partiyalar və ictimai təşkilatların nümayəndələri, deputatlar da aclıq aksiyası keçirirlər.
Azərbaycan hökuməti ölkə KİV-nin vəziyyəti və insan haqlarının tənqidi ilə razılaşmır.
"Biz jurnalistləri beynəlxalq təşkilatların tələbi ilə əfv etmirik. Biz bunu Mətbuat Şurası və Azərbaycanın jurnalist təşkilatlarının xahişi ilə, jurnalistəlirin düzgün yola qayıdacağı ümidi ilə edirik" - deyə bazar ertəsi Bakıda Azərbaycanın Prezident Aparatının ictimai-siyasi şöbəsinin müdiri Əli Həsənov bildirib.
Azərbaycanın hakim partiyası hesab edir ki, aclıq aksiyası keçirən jurnalistlər rəsmi Bakıya təzyiqlər göstərmək arzusunda olan xarici qüvvələrin əlində alətə çevrilirlər. "Kimsə planlarına uyğun olaraq, Azərbaycana kölgə salmağa cəhd göstərir" - deyə cümə günü hakim partiya - Yeni Azərbaycan Partiyasının (YAP) icraçı katibi, deputat Əli Əhmədov jurnalistlərə bildirib.
Əhmədovun sözlərinə görə, Azərbaycan hökuməti hesab edir ki, ölkədə mətbuat və söz azadlığı təmin olunub. Bununla yanaşı, hökumət Azərbaycanda KİV-in gələcək inkişafı üçün siyasi iradə numayiş etdirir. "Hər hansı mətbuat numayəndəsi qanuna uyğun olaraq, cəzalandırılıbsa, bunu söz azadlığı və mətbuata qarşı istiqamətlənmiş aksiyaya çevirmək lazım deyil" - deyə Əhmədov əlavə edib. O, hesab edir ki, Azərbaycana qarşı xaricdə yanlış fikir formalaşdırmağa cəhd göstərən xüsusi kampaniya yaradılıb.
Müəlliflə əlaqə saxlamaq üçün elektron ünvan: [email protected]
