Azərbaycan, Bakı, 21 may / Trend , müxbir R.Ergün/ Azərbaycanın futbol üzrə Premyer-Liqasının iştirakçısı olan "Qarabağ" klubunun futbolçusu Şəhriyar Xəlilov Almaniyanın "Ayntraxt" komandasına baxışa dəvət olunub. Bu barədə çərşənbə günü Trend -a "Qarabağ" klubundakı mənbələr məlumat verib.
Xəlilov Azərbaycanın 17 yaşlılardan ibarət yığma komandası ilə Almaniyada təlim-məşq toplanışında olarkən "Ayntraxt" klubunun məşqçilərinin diqqətini cəlb edib. Azərbaycanlı futbolçu Almaniyada keçirdiyi oyunların birində qol da vurub.
"Qarabağ"ın futbolçusu yarımmüdafiəçi mövqeyində çıxış edir. Sənədləşdirmə işləri başa çatandan sonra Xəlilov Almaniyaya gedəcək.
"Ayntraxt" Almaniya Bundesliqasının son mövsümunu 46 xalla doqquzuncu pillədə başa vurub.
Xəlilovdan başqa, Azərbaycanın daha bir futbolçusu, "Neftçi" klubunun üzvü Araz Abdullayev İtaliyanın "Udineze" komandasında baxışdan keçir.
Məqalə müəllifi ilə əlaqə ünvanı: [email protected]