Azərbaycan, Bakı, 11 noyabr / Trend , müxbir P.Əliyeva/ Azərbaycanın cənubunda yerləşən Lənkəran (paytaxt Bakıdan 270 kilometr aralı) meşələrində ağacları qanunsuz kəsən üç meşə gözətçisi vəzifəsindən azad edilib. Bu barədə çərşənbə axşamı Trend -a Lənkəran şəhər Meşə Mühafizəsi və Bərpası Müəssisəsinin direktor əvəzi Əflan Həsənov bildirib.
Lənkəran meşələrindən 10 ayda 478 kubmetr ağac kəsilməklə dövlətə1 666 manat dəyərində ziyan vurulub. Qanunsuz qırıntıların həcmi ötən ilin müvafiq dövrünə nisbətən 7,5 dəfə azalıb.
Onun sözlərinə görə, ağacları qanunsuz kəsərək satan 7 meşə gözətçisi saxlanılıb. Onlardan 4-nə şiddətli töhmət verilib, 3-ü isə vəzifəsindən azad edilib. Meşələri qırdığına görə 3 vətəndaş məhkəməyə verilib.
Həsənov tör-töküntüdən tədarük olunmuş 35 kubmetr odunun güzəştli qiymətlərlə aztəminatlı ailələrə satıldığını (cəmi 466 manat), 24 kubmetr odunun isə pulsuz şəhid ailələrinə verildiyini deyib.
Lənkəran Meşə Mühafizəsi və Bərpası Müəssisəsinin Meşə fondu torpaqlarından18 min 923 hektarı Nazirlər Kabinetinin sərəncamı və Ekologiya və Təbii Sərvətlər Nazirliyinin əmri ilə Hirkan Milli Parkına verildiyindən, hazırda ərazisi 7 030 hektardır.
Məqalə müəllifi ilə əlaqə ünvanı: [email protected]