Azərbaycan, Şəki, 16 fevral / Trend , müxbir X.Əkbərova/ Azərbaycanın Balakən rayonunda çay yarğanının uçması nəticəsində tunc və daha qədim dövrə aid arxeoloji tapıntı - qədim tikili aşkarlanıb.
Azərbaycan Milli Elmlər Akademiyasının (AMEA) dissertantı, etnoqraf Akif Məmmədli bazar ertəsi Trend -a bildirib ki, Balakən rayonunun Qamıştala kəndi yaxınlığında Əyri su çayının Katex çayına tökülən ərazisində yarğanın uçması nəticəsində tunc və qədim dovrə aid olduğu guman edilən qəbir üzə çıxıb. Qəbirdə çoxsaylı tünd qara və açıq sarı rəngli saxsı qablar aşkarlanıb. Qablar dəfn olunan adamın ayağından başına qədər düzülüb.
Ən maraqlısı isə odur ki, uçqun nəticəsində qədim tikilinin qalıqları üzə çıxıb. Məmmədlinin sözlərinə görə, bu ərazidə yer üstündə bir neçə qədim məbədin qalıqları təxminən 1.5 km ərazidə, bir-birindən 300-500 metr məsafədə hələ də qalmaqdadır. Bu vaxtadək həmin ərazidə çoxsaylı küp qəbirlər də zaman-zaman uzə çıxıb.
Tapıntı ilə bağlı dərhal AMEA-nın Arxeologiya və Etnoqrafiya İnstitutuna məlumat verilib. Məmmədlinin təşəbbüsü ilə İnstitutun bu gün rayona gələn mütəxəssislərinin iştiraki ilə həmin ərazidə arxeoloji qazıntı işlərinə başlanılacaq.
Azərbaycanın şimal-qərb bölgəsində yərləşən Balakən paytaxt Bakıdan 448 km. məsafədədir.
Məqalə müəllifi ilə əlaqə ünvanı: [email protected]